Chok到嘔
2015/06/30 09:02:25
網誌分類: 時事
希臘危債瀕臨爆煲，嚇到全球股市腳軟，美國的股票恐懼指標VIX指數昨日升35%至19點，美股跌2%，而且全日一直向下。德國股市及法國股市勁插超過3.5%！主角希臘索性停市唔做交易，在美國上市嘅希臘銀行就跌好
慘啦，其中希臘國家銀行（National Bank of Greece），昨日就大跌超過23%至1美元樓下（呢隻股票去年股價超過4美元）。
美股昨日亦受到巨震，初時當無到，開市前杜指期貨一度只跌百幾點。但開市後三大指數慢慢一步步向下，結果罕見地大跌2%，杜指跌350點，收報17596點；標普500指數跌44點至2058點；納指失守5000點，跌122點至4958點。
由美股的反應可見，市場未充份消化希臘脫鈎的風險。美股昨日大跌主要受到金融股拖累，杜瓊斯金融指數跌超過2.4%，歐美企業關係最密切的是金融業，所以受到牽連。
BMO私人銀行首席投資官Jack Ablin表示，美國經濟與股市好大部份與希臘危機毫不相幹。美股其他板塊跟著跌，係投資者過敏反應影響，標普500指數仍然企穩200天平均線，有一定防守力。依家唔係世界末日，好快又風平浪靜，所以依家反而係低吸時機。Ablin補充，今次嘅希臘危機，主要係希臘出咗個失敗嘅領導（failing leadership），搞得事件一團糟。
希臘同國際債主就希臘經濟緊縮方案傾唔埋欄，希臘國會上周六淩晨通過一個將於7月5日舉行全國公投，呼籲民眾投票反對債主反建議的緊縮政策方案。希臘採不合作態度，歐盟亦拒絕希臘延長今日到期嘅一筆國基會（IMF）16億歐元欠債的要求。希臘已經窮到濃，市場預期希臘能夠如期還債的可能係零，希臘面臨破產，好大可能被踢出歐盟，市場擔心歐元受到衝擊，更重要的是歐盟內經濟比較弱嘅成員國，會有樣學樣。
激進派希臘總理齊普拉斯希望將希臘民眾意願擺上台「曬冷」。而事實上，據最新嘅民意調查，約四分之三希臘人民希望留在歐元區，過半數民意願意接受國際債權人提出的方案。呢個結果可能會在公投中反映出來，但未公投，國家已經要破產，受害的最終都係希臘民眾，以至全世界的股民！評級機構標準普爾再調低希臘的主權信貸評級，由CCC降一級至CCC-，這是更垃圾的級別，佢估計希臘有一半機會違約賴債。
希臘危機如過山車，股民要有足夠的財政、心理及生理承受力，先至好在呢種市道買股。
我昨日問「跌1000點大家有無嚇親?」好多網友答和我風雨同路咁多年，有乜大風浪未見過。咁又係，而家同2008年比，真係細雨微風。不過網友依家控股好搞笑，佢話「陸sir，我地未死得，不過好似上左飛機然後遇到十級氣流chok足全程咁者，依家面青同嘔緊囉，相信專業既飛機師係唔會驚，可惜我地大部份人都唔係專業飛機師」。所以我送四個字俾大家:「量力而為」。
陸羽仁
回應(15) 我想回應
陸羽仁 BLOG 舊文
