魚樂無窮：大上落好波不如好運
■A股光怪陸離現象，港股正陸續浮現，散戶有得震冇得瞓。 資料圖片
周一經歷恐慌式跌市後，即晚夜期一度插至24000邊，諗住實死無生，點知中證監漏夜澄清無意退市，兼會擇機增持，夜期跌幅大為收窄，還原基本步，冇事發生。
好啦，阿爺打曬開口牌撐市，噚日仲唔嚟個
報復性反彈？Sorry，A股早段再插5%，H股一度失守股災收市低位，恒指亦考驗24000，吹咩？大家萬念俱灰之際，A股一個鐘內竟然極速收復失地，最多仲要倒升1%，帶動恒指由低位喪挾800點，似要將所有生物chok走。Ok，畀你夠膽高追，又如何？內銀內險持續弱勢，港股最後再玩虎頭蛇尾，埋單只升151點，高位計升幅唔見七成。
不足24小時翻天覆地
不足24小時有翻天覆地嘅變化，捉到路嘅當然贏到開巷，但咁好眼光嘅人，數目相信少過選委會委員，更多嘅應該係左一巴右一巴，輕則損手爛腳，重則吐血身亡。股民心路歷程，足夠拍成一齣連續劇，最可怕嘅係，呢啲劇情往後會無止境出現。A股光怪陸離現象，港股正陸續浮現，港交所（388）揸fit人李小加，成功將中港股市完美融合，登上國際大舞台，令劇情更加豐富，最佳導演呢個獎項，當之無愧！一句到尾，要喺呢種市況贏錢，學金句王黃興桂話齋︰「好波不如好運！」
唐牛
https://www.facebook.com/tongcow88
唐牛
魚樂無窮 - 唐牛 舊文
