魚樂無窮：波動市新常態揀惠理
■惠理基金資產規模達175億美元。圖為集團主席謝清海。 資料圖片
話A股係最chok嘅市場，相信冇人會反對︰周一瘋狂震倉，周二絕地反擊，周三突插半成。究竟係調整完成、重現牛氣，抑或屬死貓彈、牛去熊來？好淡兩派各自表述。好友認為，阿爺出盡法寶托市，又減息降準
又養老金，反映股市救經濟任務未完，之後還有深港通、納入MSCI等好消息，中長線繼續睇好。淡友認為，升市全由孖展硬砌上去，場外配資金額天文數字，難以估計，如今拆倉潮一發不可收拾，要回復以往生氣，談何容易。
作為樂觀派，唐牛當然認為牛市未完，不過，戰友們要有心理準備，A股過山車市況會成為新常態，港股受牽引下亦會變得難玩。今日推介惠理基金（806），憑藉三大優勢，喺波動市下逢低吸納，炒波幅又得，中長線坐貨亦得！
1.基金互認。噚日起開始實施，初期南北向資金進出各3,000億人仔，以惠理嘅知名度及規模（最新管理資產總值達175億美元），要搶頭啖湯絕無問題，意味又多一個吸水源頭。
2.業績一流。上面提到惠理資產規模達175億美元，比起年初嘅129億美元，大幅上升36%，明顯食盡中港股大牛市，淨係收表現費都收到手軟。
3.信謝清海。由高位減持到預測A股大跌兩成，均顯示其眼光準繩，與其自己買大細，不如交畀高手處理，乾手淨腳。
唐牛
https://www.facebook.com/tongcow88
唐牛
魚樂無窮 - 唐牛 舊文
