女神tea time：施主未免言重了
■子女未來住太和還是銀湖．天峰（圖），視乎家長的身家。 資料圖片
唔知幾時開始，學生放暑假，唔係真係休息享受童年生活，而係上一個又一個興趣班。
大埔一間補習社為谷生意，出動「靠嚇」呢招，宣傳單張中向家長指明「子女未來住太和還是銀湖．
天峰，視乎暑假您的安排！」嘩！施主未免言重了，一個暑假唔補習就影響你住乜樓，咁係咪24小時讀書做到富翁先？
呢個廣告有兩大錯誤，第一係抽錯水！度橋位人兄，一開始一定覺得自己好叻叻，又識用infographic，又抽到樓價貴水，擺明博見報。文中暗示住太和窮啲，大錯特錯！而家咁係咪即係話住太和好失禮？政治不正確，住太和的家長第一個唔會畀個仔讀，另外係價值觀不正確，就算好多家長心入面嗰句真係想個仔讀多啲書買到樓，但都唔會用充滿銅臭味嘅比喻去教仔，咁樣連銀湖．天峰嘅客都畀你趕走埋。第二係你係抽水就有大志啲，銀湖．天峰呎價12,000元多啲，中產樓而已，何不拎半山豪宅去比？再講，作為補習社，「快人一步」個「步」都寫錯成「歩」，冇核對就出街，得過且過，家長點信得過你？
呢個故事教訓大家，水唔係咁抽，教育機構要宣傳，都應係以教育理念行先。好多人都話而家上車，成功靠父幹，香港樓價高居不下，「子女未來住太和還是銀湖．天峰，視乎家長的身家！」
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文
