魚樂無窮：A股起死回生仲大鑊
■滬綜指由高位回落近三成。 資料圖片
滬綜指由高位回落近三成，蒸發市值相當於十個希臘嘅GDP，炒燶股跳樓個案一個接一個。對中國來說，由孖展構建而成嘅牛市，來得快狠準，主觀意願可以穩住疲弱經濟，但因全面拆倉而來嘅冧市，卻是前所未見，一旦失控，後果難以想像。現
階段要股市止跌，同時消化數以萬億甚至十萬億元計嘅孖展沽盤，係一條艱深嘅數學難題，如何解決誰也說不準。
對於阿爺救市嘅決心，唐牛絕不懷疑︰減息降準、匯金護盤、逼券商托市，以至叫停IPO、推平準基金、調低印花稅等，狂風掃落葉式出手。普羅股民當然希望A股極速收復失地，重拾牛氣，但我認為，如果A股能夠起死回生，更加大鑊！
打個譬喻，細路仔偷懶唔做功課，父母唔想佢俾學校罰記缺點，唯有親自幫手，倒頭來細路仔乜都學唔到，將來依賴心態只會變本加厲，衣來伸手，飯來張口，最終變成廢人。A股一樣，大媽今次牛市貪勝不知輸，越賭越大，最終高位全部套牢，接近血本無歸之際，發現阿爺原來會包底，後果係點？有錢就是任性！以後只會買得更狠，不理基本因素。一個不成熟嘅市場，變得更不成熟，隨時普通融資都做唔到，靠佢救經濟？妄想！
說穿了，今次A股跌市乃信心危機，阿爺越出招，大媽信心越受挫，如何挽回股民信心，才是問題的核心。
唐牛
https://www.facebook.com/tongcow88
唐牛
魚樂無窮 - 唐牛 舊文
