中環在線：
借畢加索名畫讚有獨特美
馬雲曬老中青餅印相
■馬雲噚日上載咗三張鬼馬圖片，主角都同佢好鬼似樣。
【華華贈馬雲靚相】馬雲頭戴「飛碟」，加埋對「大眼睛」，勁似外星人。 資料圖片 經常自嘲嘅馬雲，噚日上載咗四張圖文並茂嘅鬼馬圖片，
其中三張相嘅主角都同佢好鬼似樣，佢仲喺新浪微博呼籲「還有沒別的圖，歡迎來稿」，華華見馬雲喺中國股災都肯忙裏偷閒，犧牲自己「色相」為股民發笑彈，仲誠徵靚相，咁就送返一張靚相畀佢啦。
馬雲之前喺台灣曾經自嘲長相似外星人，所以華華今次都特登揀咗一張舊相畀佢。
呢張相攝於佢前年喺科大獲頒榮譽博士，圖中嘅馬雲頭頂戴「飛碟」，配上一雙「大眼睛」，真係幾分似外星人㗎。
讚相中小朋友「英武」
再講講馬雲上載嘅三幅相片，佢首先揀咗畢加索嘅名畫《Two acrobats with a dog》，仲放大咗其中一個雜技演員嘅大頭，的確畫中人同馬雲有幾分相似，馬雲就乘機自誇，話幅畫令佢「真正體會到大師對美的獨特角度」。
馬雲又揀咗一張中國兒童嘅相，點題話「還以為是家裏人上傳了我小時候的照片」，大讚相中小朋友「英武」，不過就話自己童年非常百厭。有雲三歲定八十，華華就覺得今年51歲嘅馬雲仲好百厭，皆因佢惹火，成日爆出令人紅眼嘅金句。
最後一張就係一位老伯坐喺木梯嘅相，馬雲話希望自己老咗都會有老伯咁「愜意」，查實馬雲買咗幾間香港上市公司，未正式有大動作，市值已經翻幾番，咁咪仲愜意。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
