魚樂無窮：邊隻股好過港交所？
■大快活在20蚊買剛有4厘息，夠曬穩陣。 資料圖片
「快啲搵隻好嘢嚟救亡啦！」連續兩日齌吹冇貨交，相信戰友對唐牛已經極不耐煩。老老實實，雖然個市跌到一仆一碌，好似周街平貨咁，但平與貴其實係相對的。大時代下，好多時都係炒憧憬，泡沫吹到有咁大得咁大，一旦還原基
本步，秤身家、秤業績、秤派息，之前美夢全部成空，所謂折讓變成溢價，周街平貨變成周街垃圾。
好似大賭場港交所（388），第一季一直喺170至180蚊徘徊，大時代後火箭式炒上300蚊過外，真係因為千億成交新常態推高盈利咁簡單？其實大家都係憧憬滬港通後有深港通，再加埋北水南調及MSCI納入A股等，配合中港股市大融合，港股成交破萬億其實唔難。而家？阿爺自己都救唔掂，大融合更不知從何說起。港交所仲企得穩200蚊樓上，實在萬幸。市盈率50倍，息率只得1.8厘，短期毫無憧憬可言，真係你買埋我嗰份。
現階段揀股只能還原基本步，從業績及派息角度出發，就算坐貨都有數得計兼有股息補貼。上月底公佈業績嘅大快活（052），盈利大增34%，毛利率擴闊至14.9%，跑贏大家樂（341）及翠華（1314）。連續十年無間斷派息，成為另一亮點，加上屬傳統本地薑，與內地斬倉潮劃清界線，公司連日出手回購，相信離底不遠，等20蚊買剛有4厘息，夠曬穩陣。
唐牛
https://www.facebook.com/tongcow88
唐牛
魚樂無窮 - 唐牛 舊文
