異動空間：人仔再貶兩成？
美股閃崩千點、反彈800幾再隊400點；港股怒挾600點、倒插300幾再彈153點收市；日股急瀉700幾、倒升300後再飛墜千點，三者共通點——唔正常。呢種唔正常，每隔幾年就會出現一次，上次起因係2011年歐債危機、美國失去三條A評級；今次係人仔貶值、美國加
息預期引爆的全球大拆倉。世界大戶一齊做嘢，梗係兵荒馬亂，我等散戶最好都係企埋一邊，等結果塵埃落定先出去攞番個彩，家陣行出去做「炸兩」隨時命到冇。
國家隊萬億救市資金倒落鹹水海，券商為國接盤、預期般壯烈犧牲。阿爺乜架都丟清，點落台？彭博引述話中央研究點救，故暫時唔托住，仲話有領導指A股規模好細，爆咗都影響唔到實體經濟，聽到真係笑咗。之前方針係谷起A股製造財富效應推經濟，講到股市萬能咁。如今出師未捷市先死就話A股死不足惜，公你贏字就我輸，講曬。而彭博又爆有內地經濟部門，美元兌人仔今年參考滙率係7，明年係8，即仍要貶值兩成，內地債重航空、資源股大鑊了，中建材（3323）向海嘯價邁進，下隻會否是玖龍紙業（2689）？
魏力
http://www.facebook.com/2012jason
魏力
異動空間 - 魏力 舊文
