中環迷你裙：股災大佬尚未現身
■恒指8月24日挫1,158點，藍籌成重災區。 張志華攝
7月8日，恒指跌1,458點，8月24日，恒指挫1,158點，驟眼睇咪又係股災！事實又能否如此輕描淡寫？7月二三線股頻追孖展，那浪直撲全港散戶，散戶自此興致跌至冰點；前日那千點下跌，
意義更深遠，藍籌成重災區，死頂的中移動（941）即時棄守暴瀉8%，大戶都要補倉，災難程度已不僅是Sam呢啲老散。
最具指標性的道指，7月那浪僅跌逾1%，8月這浪只消幾日跌穿2009以來的上升軌，美股期貨也有跌停的一日，全球對環球冧市有不同演繹，美國加息、人仔貶值、新興走資，當以上全是跌市理由，可解讀為最終「大佬」未現身。
死肥仔阿強食慾不振，大家都話「梗係你太重磅食滯了。」急劇減磅後，身體非但沒改善，反而更差，原來有更大隱疾在後，A股本年升幅已全數蒸發，去槓桿後原來件事唔係咁簡單。真相浮面助了解股市破壞程度，家陣原因不明，大家恐慌起來沒完沒了地掟貨。Samantha碰見炒友劈頭都係問：知唔知出面發生乜事？最新答法是熱錢來源地中東石油大國，俾油價打到七個一皮，外儲大減下熱錢急退，加埋各國頭暈身㷫，7年蜜月期玩完。跌到何時？極其量只是中段。
Samantha
本欄逢周三、五刊出
https://www.facebook.com/stocksamantha
Samantha
中環迷你裙 - Samantha 舊文
