阿爺唔出手硬出招
2015年08月26日
港股經過七連跌，跌到阿媽都唔認得後，昨日終於反彈，一開市就抽高，不過內地唔爭氣，直插無水花，上證綜指3000點都穿埋，大跌7.6%，拖住港股向下，要等內地收市才彈0.7%收場，叫做升153點，可以話一額汗啦。阿爺不再入市干預，所以海外股市彈，
佢都照樣大插，其實在補番七月應跌未跌的跌幅。
一招了難頂大市
收市之後，阿爺終於出政策招，人行宣佈「降息兼降準」，由明日起，一年期貸款及存款基準利率下調0.25厘；同時宣佈自九月六日起，下調金融機構人民幣存款準備金率0.5個百分點，並額外下調金融租賃公司和汽車金融公司準備金率3個百分點。
阿爺降息細力，降準大力啲，降準不是0.25、而是0.5個百分點。估計因為減息對人仔的匯價影響大啲，所以要忍住手去減。另外汽車金融準備金仲降3個百分點咁多，亦想谷下汽車借貸和消費。
華爾街焗儲局押後加息
中央唔再入市，但硬出政策去挺，從樂觀角度睇，內地股市短時間插了1000點，跌幅較大，中央出招可成為反彈藉口。但悲觀一面是怕人仔會受「雙降」影響下跌，加上過去好多次阿爺出招後股市都是彈完再插，若然只是「一招了」，唔易頂得順。所以後續要看中央仲有無其他招數，同埋美國會否如預期在九月加息。
依家全球市場焦點，開始落在聯邦儲備局的利率政策上。中環茶友話，美股咁跌法，等如變相想逼聯儲局押後加息。將利率推回較正常水平，本來係聯儲局主席耶倫的任務之一，亦是衡量其能力的標準之一。只係世事不會盡如人意，按依家牌面睇，聯儲局若然夾硬喺9月加息，好可能造成巨大衝擊，現在要睇做開鴿派的耶倫會否就範。
講番昨日個市，美股上日食完一輪驚風散，到內地股市開市投資者又沽過，滬指甫開市便大幅低開逾6%，午後再跌急啲，3000點大關失守。上證指數全日收報2964點，跌244點或7.6%，連同昨日暴跌，上證指數自上周五3506點起計兩日瀉15.4%。
中證監表態不入市
內地股市咁弱，主要係市場覺得阿爺態度有明顯轉變，所以再無人托市，呢個分析源於證監會八月十四日發佈的一則公告，證監會稱，股市漲跌有其自身運行規律，一般情況下政府不干預，政府的職責是建立和維護公開、公平、公正的市場秩序，保護投資者特別是中小投資者的權益，促進股市長期穩定健康發展。但是當股市發生劇烈、異常波動可能引發系統性風險時，必須及時、果斷採取多種措施，穩定股市。
市場對此解讀成為，證監會已經明確自身定位，不再干預市場自身漲跌，由着眼指數幾多點，改為着力打造「公開、公平、公正」的市場秩序，結果咁就令到A股失守埋三千大關。
由於A股急瀉，港股午後跳水，一度挫386點，低見20865點，尾市買盤先湧現，港股尾市回升，最終升過百點收市。恒生指數收報21404點，升153點；國企指數收報9514點，跌88點，成交縮減至1345億元。
陸羽仁
金融High Tea 舊文
