中環在線 - 李華華 2015年8月27日
中環在線：
食過翻尋味 股災撐愛股
湯文亮半億掃港交所
■湯文亮周一動用過半億，掃入30萬股港交所。 資料圖片
股市風雨飄搖，股民坐緊超級無敵過山車，但港交所（388）忠實擁躉──紀惠行政總裁湯文亮就真金白銀力撐愛股，本周一港股大跌市當日，再度掃貨，動用超過半億，掃入30萬股港交所。
湯文亮今年憑「細價樓爆煲論」而人氣急升，雖然樓市未爆，令佢輸咗一場牙骹戰，但佢之前將滙控（005）股票換曬做港交所，食正港交所早排大升條水，分批沽貨賺過5,000萬元，都係股市贏家。
近排環球股災，港交所當然首當其衝，噚日收報180元，較5月高位309元，唔見咗四成。雖然如此，仍然冇損湯文亮對港交所嘅鍾愛程度。
湯文亮自爆，周一當港股插水過千點，佢就喺180蚊，掃入30萬股港交所，涉資5,400萬元，佢當係將之前賺嗰筆錢用嚟再買貨。
周生生沽貨 獲利2.46億元
其實上月港交所跌落230蚊時，湯文亮已經掃入1萬股。佢話前日再買都冇特別原因，並非因為心癢癢要撈底，而係覺得港交所喺180蚊已經差唔多係最低。佢掃完貨先知趕及除淨，可以收息，以股息3.08元計算，淨係呢30萬股都可以收息超過92萬元。
本來湯文亮噚日都打算再撈啲貨，可惜個市冇再大跌，結果佢按兵不動。佢補充話，呢排個市好亂，買乜都要講穩陣，一定要揀啲負債冇咁重嘅股票嚟買。
湯文亮咁鍾意港交所，持有港交所15年嘅周生生（116）就繼續當佢係提款機。周生生噚日公佈業績時披露，上半年沽出89萬股港交所，獲利2.46億元，家陣仍然持有406萬股港交所，可以有排慢慢沽。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
