魚樂無窮 - 唐牛 2015年8月27日
魚樂無窮：當叮噹變成聞西
■國產淩淩漆最經典莫過於聞西嘅攞你命三千，將西瓜刀、單車鏈、火藥、硫酸擺埋一齊，成為超級武器霸王。 資料圖片
叮噹，現稱多啦A夢，一個膾炙人口嘅卡通人物角色，陪住每個細路仔成長，一個百寶袋，內藏無限法寶——隨意門、縮細電筒、時光機，幫助大雄解決無數問題，百看不厭。
國產淩淩漆，周星馳經典作品之一，將無厘頭風氣發揚光大，同樣出現多種騎呢產品——古惑的槍、太陽能電筒等，最經典莫過於聞西嘅攞你命三千，將西瓜刀、單車鏈、火藥、硫酸擺埋一齊，成為超級武器霸王。
「唐牛，你輸錢輸到傻咗呀？語無倫次嘅？一早叫你腳踏實地做人啦！」輸錢一件事，卻非語無論次。A股升幅倍倍聲，場內場外孖展隨時爆煲，阿爺淆底，使出暴力救市，呢邊廂拉人封艇、限制沽空，逼券商出錢出力托市，那邊廂無啦啦將人仔貶值，將全球金融秩序步伐完美打窒，資金流七國咁亂，股匯債市喪玩坐過山車。減息降準亦無力令股市回春，救市宣佈失敗，輸錢嘅卻是全世界股民。
阿爺一向予人無敵嘅感覺，恐怖如金融海嘯，都可以用四萬億救市擺平，就如大家心目中嘅叮噹一樣，百寶袋內總有適當嘅工具拯救市場。
但經過今役後，叮噹拎出嚟嘅法寶，竟然係攞你命三千嘅西瓜刀同單車鏈，幫大雄做功課、考試、教訓阿福同技安？露底兼技窮了！
唐牛
https://www.facebook.com/tongcow88
唐牛
魚樂無窮 - 唐牛 舊文
