有形之手讓位
2015年08月27日
人行使出「雙降」招數救市，但現時市場關注係美息走向同人民幣匯價，放水招數唔可以話無用，但唔係完全對症。
多間外資投行均認為不足遏制中國股市跌勢，投資者趁回升拋售，滬深兩市昨日表現反覆，上證全日先升後跌，三千大關得而復失，全日跌逾1%收市，深成
指數跌穿一萬關，內地股市下插，有尋底跡象，反而香港股市叫做強韌一啲，初期唔係咁肯跌，到下午收市前先見有沽盤推低個市。
增市場化啱外資口味
A股探底，睇番過去兩個月內地股市升極而爆，中央態度係先作強力干預，但八月中開始，就見大方向改變，首先係容許匯價下跌，然後係股市減少干預，中證監今個星期講明唔再注重指數，無論係股抑或匯，有形之手都讓位畀市場力量，唔再硬頂，咁做法會令市況短期波動增加，同時令調整加快。從樂觀角度嚟睇，由市場去決定價格，令資產價加快貼近市價，可以減低拋售壓力，呢個做法亦比較貼合外資口味，希望調整到底後，可以先苦後甜。
人仔情況都差唔多，內地增加人仔市場化，容許佢隨市況下調。前日中國放水，理論上匯價應會轉啲，但昨日見到人仔匯價相對穩定。中國外匯交易中心數據顯示，美元兌人民幣收報6.4095，較上個交易日6.4115，跌20點子，即係話人仔仲有好輕微回升。
由於中央放開手，由中央引起的資產震盪短期繼續擴散，美股同港股ADR都係一彈就散，同樣情況發生喺A股之上，港股在雙降之後，見到內地滬深指數最終分別挫1.27%及2.92%收市，恒生指數收報21080點，挫324點或1.52%，高低波幅達626點；國企指數連跌九日，收報9427點，跌86點或0.91%，成交略縮至1088億元。
藍籌股中，長和(001) 中期核心盈利賺149.38億元，比市場估計勁，股價喺跌市依然受壓，收造100.3元，跌2%；長實地產(01113) 中期多賺22%至68.9億元，收造50.3元，跌3.6%。
內地調低息口同準備金率，建行(939) 仍跌1.5%，報5.38元；國壽(2628) 跌1.6%，報24.55元。
中海油(883) 公佈中期業績，股東應佔溢利下跌56%，每股基本盈利0.33元人民幣。中海油昨日收報8.06元，升1.8%。油價去年開始大跌，但中海油跌幅唔係跟得咁足，相信同中央放出消息令市場炒作重組有關，?家油價再插兼撞正股災，股價終於頂唔順下插。
跟大股東買股買到手軟
雖然內地想刺激消費，但就一輪拋售指向內需股，幾隻龍頭表現都差。恒安(1044) 挫5%，報71.9元；康師傅(322) 跌4.7%，報11.44元。
呢排股票大平賣，出來增持的大股東都多咗，康師傅(322) 公佈，獲主要股東三洋食品株式會社知會，其已於8月26日購買該公司股份總計600萬股。
購買完成後，三洋持股量升至18.78億股，佔已發行股份總數約33.51%。
大股東增持係對股價有信心的表現，不過，股價短期表現好多時同大股東睇法未必一致。有中環茶友有鋪癮，就係留意大股東增持股份作為投資目標。如果有心儀股份想買，見到大股東增持，佢就唔郁手住，希望有機會買得平過大股東，佢話咁就特別有成功感喎。
呢排茶友就大把機會可以叻過大股東，入到比大股東平嘅股票，令到佢慨歎買貨買到有少少手軟！
陸羽仁
金融High Tea 舊文
