笑到最後：
重見23000點吧！
上星期一，本欄估唔會有大反彈出現，不幸嘅事情出現，見報當日立即急跌1,158點，到禮拜尾收復部份失地又急急回塘，又係嗰句：「大戶食相難睇」。
再估一次：高明預計今個星期重上23000點，然後大家覺得見底冇事，跟住又繼續熊市下跌。之前估冇大反彈，今個禮
拜又估會上23000點，係咪轉軚？係啩，因為上星期一跌得太急，但熊市睇法未變。
唔炒高點散貨
至於點解覺得會上23000點，原因包括：一、唔炒高點樣再散貨，上周五即日大縮水，人心虛怯，有必要再造一次假升幅引大家落疊，然後再派過；二、23000點係粗略估計，港股大時代前，23000點以上係「高位」，假設基金全球大散水，美股呢幾年賺到笑，港股趁勢重上之前高位再派過。
𠵱家本欄分析大市方法非常簡單，開股價圖，用手掌將4月至7月遮住，咩位高咩位低，大致有個譜。不過前設變咗，之前中國靠吹，經濟放緩仍可自稱強國；暴力救市失敗後，發現中國政府同全世界所有政府一樣，只能財富再分配，無能力促進經濟，中國必然面對衰退。
呢個前設之下，中港股市只會步入熊市，未來預測估值一定會再下調。而中國暴力救市扭曲市場調節，取之於民嘅資金用嚟救國企，即係政府態度係唔肯面對失敗，今次調節過程會極之漫長，此乃後話。
呢個時候，唔止係檢討手上組合有咩要去留，仲要對股票有懷疑之心。以香港人可以買到嘅資產計，港股唔算優質。美股跨年大牛市，港股冇份；對A股跟升少，跟跌多。
再宏觀少少睇，同樓市比較。買樓買中四五線，例如屯門公屋良景邨，你有能力守，一樣可以笑到最後；買股票唔同，買中一隻四五線股，七年一遇大牛市，佢都可以不升反跌。呢個亦都解釋咗點解香港人對樓市有宗教性嘅崇拜，但係對股市既炒之又防之。
因為香港股市所有從業員賺錢對象只有一個：散戶。中小型細股莊家不言而喻，但係堂堂國際級基金，都寧願屈強迫金機，賺手續費，然後幫大價藍籌股每月接貨，鎖死到客戶65歲先有得攞，供近50年先過「禁售期」，將賺散戶錢制度化。
對機構而言，港股錢太易賺，毋須要絞盡腦汁用分析炒股，用少少錢lobby政府，每個月自然有散戶送錢。趁住熊市，係時候思考股票──特別係港股，仲有冇值博率。安全做法，以大時代成交為指標，𠵱家大約冇咁一半，咪將自己個倉縮一半囉。
高明
https://www.facebook.com/bigricetea
本欄逢周一刊出
高明
笑到最後 - 高明 舊文
