魚樂無窮：
細價股進入安全期
■雅天妮市值3億幾元。圖為集團主席謝海州。 資料圖片
本周最重要消息，莫過於儲局議息，究竟加定唔加，依然冇人夠膽一口咬定。幾何肯定，大市今個星期靜過鬼，無他，咁大個不明朗因素擺喺眼前，除非你嫌錢腥，否則都唔會大注賭單邊。有見及此，唐牛宣佈，大市進入細價股
安全期，有效期至星期四！「有乜證據先？唔好口響響！」其實本欄上周五已提出，細價股（泛指市值）有鑊氣，當日細價股炒風更盛，好似半新股前進控股（1499）咁，一棍炒高35%，資金明顯由大價股轉投細價股。
「好多人話中港股市唔掂，殼股需求大減喎！」話你知兩件事︰
1）《蘋果》訪問一位會計師董事，根據佢嘅講法，一隻靚殼叫價已去到6億，比起市傳嘅5億還要多。
2）疑似殼股盈進（1386）上周五停牌，睇嚟易手好事近了。兩單消息一個結論，殼股依然有價有市，只要市況配合，絕對可以炒到飛天。今個星期天時地利人和齊曬，炒細價股唔使等埋發叔喇。
唐牛一炮過畀兩隻心水大家參考。第一隻，雅天妮（789），供股後一直未見大動作，市值3億幾，現價較高位打五折，抵玩！第二隻，星光集團（403）。市值仲細，2億幾，NAV講緊1.02元，市賬率0.45倍平得可憐，如果盈進市賬率1.1倍都賣得成，星光肯放盤嘅話，爭崩頭指數達十粒星！
唐牛
https://www.facebook.com/tongcow88
唐牛
魚樂無窮 - 唐牛 舊文
