笑到最後：
翻兜中外運睇5蚊
大家都知今次跌浪，高明身為一個淡友，多次博反彈，每次輕則輸到焦頭爛額，重則total loss，喺最欠缺EQ嘅時候，高明去咗睇香港隊對卡搭爾，香港隊雖然輸三球在先，完場前竟然可以追番兩球爭啲逼和，證明一日未完場，都唔應該咁快認輸，因為認輸等於已經完場。
過往每年都有一啲基金重點栽培股份，特點係有報告一路推介，兼且背後有國策或者重組概念跟尾守住，呢啲股份，市值過百億元，股價慢慢升，好少可一日升幾成，通常每日1%至2%，儲儲埋埋一年就差唔多升一倍。
好多年前有國際煤機（已除牌，前股份編號1683），之後有中國建築（3311）、北控水務（371）、中外運（598），本來以為今年隻基金愛股係平保（2318），可惜股災斷咗纜，此乃後話。
今日主要講隻中外運。最威水係2014年，由3蚊升到6蚊樓上，一年升一倍，當時三大概念係大行狂出報告、注資同埋物流股當旺。由3蚊升到6蚊，用咗一年時間；今年撇除股災，災後8月，由5蚊跌落最低3.2元，只係用咗半個月時間，再細心啲睇，真正「崩盤」係8月19至8月25日第二度股災殺落去，短短5至6個交易日冇咗超過1蚊。最近中外運雖然反彈，但係仍然都只係3.81元，返番去2014年股價爆上早段。
中外運跌到去呢個水平，同舊年相似嘅概念又悄悄地翻生。一、大行唱好，野村將中外運評級由「中性」升至「買入」，維持目標價5.8元，話集團可受惠人幣貶值及未來可國企改革重組；二、注資，董事長趙滬湘話過去兩年母公司都有一項資產注入，所以預期下半年都有一項物流相關資產注入，估計注入規模同舊年相若；三、人民幣貶值，根據野村報告，人民幣滙率每下跌1%，中外運明年盈利便可增0.5%。
截至舊年底，中外運每股資產淨值3.643蚊，同上周五收市價3.81元比，即使今個星期港股又出現大調整，NAV水平上下應該都有得守一守。往績PE10.9倍；同嘉里物流（636）11.3倍比仲係低少少，但係前者就有注資概念。至於乜嘢國策航運股重組，高明唔係太識呢種「國情」，亦都唔係太迷信「中央」股災後仲有乜神仙棒，所以都冇考慮呢點，有就當送。
炒到最癲個價6蚊應該冇乜行，但係如果個市真係反彈，中外運啲概念又對辦，重上5蚊冇難度，再博一次，買中外運！
高明
即上偶像派財演高明專頁：https://www.facebook.com/bigricetea
本欄逢周一刊出
高明
笑到最後 - 高明 舊文
