中環在線：業主加租 誠品搶客
開益老闆喊難撐
■80後老闆楊淑君指，現時每月營業額十零萬，租金已佔一半。 朱家駿攝 
香港人，如果鍾意閱讀嘅話，一定幫襯過樓上書店，不過近年多咗人轉睇電子書，加埋誠品進駐，業主加租，屹立銅鑼灣多年
，知名作家如王貽興、喬靖夫都有幫襯嘅開益書店近日都喊好難撐。
高峯期每月營業額50萬
開益書店日前喺facebook發出「救援」文章，指「面對開業以來最大困難」，華華噚日傍晚走去八卦嚇，發現人流並唔算多。
80後嘅老闆楊淑君（Zita）以前喺書局打工，2010年老闆搵佢頂手，佢花盡積蓄，加埋家人幫手，實現小書店老闆夢，「當時生意唔差，每月營業額高達四、五十萬元，租金平，賣書流量快，周末日書店滿曬人，仲做咗三、四年書展，賺到一筆錢。」
可惜近年個個業主都大幅加租，呢個樓上舖嘅業主由賣牛仔褲Texwood起家嘅譚氏家族持有，過去兩年累積加租40%。
Zita指，「上年簽新約，年底佔中，開始冇乜人。今年仲大鑊，自由行一簽一行，冇曬人，冇曬自由行，唔係淨係我哋，成個市都差。」
加上同行越來越強大，「誠品越開越多，書種多過我哋，快過我哋」，佢形容，目前盈利只係從大型書店「手指隙漏出來」。
生意慘淡，營業額按年跌七成，「𠵱家十零萬一個月，租金已經佔一半，仲有燈油火蠟、人工，找供應商條數，年初至今，月月嘔凸，點撐啫！人工都冇，仲要蝕。」
佢份租約明年約滿，佢希望業主可以好心減租，唔係真係冇得做。不過，若果開益書店最終真係捱唔住貴租，佢話，至多轉做網上書店。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
