習大大講股
2015年09月23日
港股昨日有少少反高潮，恒指高開後最高升過355點，但尾市大倒退，得番39點升幅，國指仲倒跌。市場本來炒國家主席習近平訪美會有好消息，暫時呢個氣氛唔係咁熱烈。有中環茶友講笑，話唔通大家驚無咗習大大在內地睇場？
習大大訪美前繼續放出利好經濟的調子。
他接受西方媒體訪問時都講吓股市，重申之前中國股市出現異常波動，這主要是由於前期上漲過高過快，以及國際市場大幅波動等因素引起的。在綜合採取多種穩定措施後，市場已經進入自我修復和自我調節階段。習大大強調發展資本市場是中國的改革方向，不會因為這次股市波動而改變，仲叫投資者畀啲耐性。
外圍腳軟尾市急回
對於人民幣大幅貶值導致中國外儲大幅下降，習大大認為，中國外匯儲備仍然充裕，外界不必反應過度。
本來，大家都睇住領導人枱戲，中港股市全日都叫做升得好好哋，港股尾市回得咁急，相信同習大大無直接關係，主要係歐洲外圍腳仔軟，搞到港股尾市沽壓。歐股唔掂主要受大眾汽車那宗用假數據令排放測試過關事件影響，加上又係話唔知聯儲局幾時加息，德國股市早段插2.4%。美股期貨亦急跌，一度下挫200點，在外圍拖累下，恒生指數下午由最多355點，高見22111點，變成收報21796點，升39點；國企指數收報9835點，倒跌63點，成交只有744億元。內銀股普遍下滑，其中四大行全線偏軟。
美國雖然暫停加息，但全球對前景仍然好憂心，股市驚完加息驚經濟，短期表現都係反反覆覆，好難一口氣炒上。富達國際投資股票部環球投資總監Dominic Rossi就話，美國聯儲局上周不加息決定做法明智，因第三輪通縮將到來，美國金融當局應等待時機，避免作出收緊政策，如果現時加息，會對中國、巴西等新興市場有不良影響，繼而對全球股市有不良效果。
佢又話，國家主席習近平和美國總統奧巴馬會面，對股市波動短期有緩衝作用，長期亦可推動兩國建設性合作的雙邊關係。由於企業盈利增長，明年底標普500指數可升至2400點，建議投資者應選擇醫療保健、科技和媒體等行業，特別是英美市場更值得入市。不過，投資者應等待波動冷卻，才根據企業基本面來選擇股票。
本地大市上上落落，暫時都係炒吓基建、鐵路股反彈，無乜邊個板塊好有吸引力。新股呢排仲好似熱鬧，外電報道，開始路演的院線公司IMAX中國(1970) ，招股價介乎29.8至34.5元，初步計劃發售6200萬股股份，集資約18.5億元至21.4億元，預計下周三定價，下月8日交易所掛牌買賣。
新股悶市啟動招股
IMAX中國主要覆蓋大中華區的IMAX影院及影片業務，上半年收入按年增長57%，至4391萬美元，虧損6795萬美元，去年同期則有盈利554萬美元。由於中國電影市場炒緊國策，成為呢隻股最大賣點。
另一隻內衣產銷商維珍妮國際(2199) 同時進行路演，主要客戶包括Victoria"s Secret、Calvin Klein及Maidenform等。銷售文件顯示招股價介乎5.38至6.38元，擬發行2.95億股新股，相當於擴大後股份25%，9成國際配售，10%公開發售，集資15.87至18.82億元，市值都唔細。維珍妮將於本月24至30日公開招股，30日定價，10月8日掛牌，保薦人為摩根士丹利。呢隻賣點唔係概念，而係民生嘢，應該會穩陣啲。
陸羽仁
金融High Tea 舊文
