一周三件 - 錢雋 2015年9月23日
一周三件：招商基金平霸
■橙天嘉禾股價由8月尾到現在，升近60%，PB貼近1倍。圖為公司首席執行官毛義民。 資料圖片
花旗華納兄弟同祖國華人文化產業投資基金兩巨頭，無耐前公佈合組「旗艦影業」。周邊電影股，周一勁彈咗一轉，但受惠嘅招商局基金（133）未升過，PB平咗大大截。
PB0.4倍唔夠
早喺2010年，招商局基金公佈，出資2億元人仔，分段投資落華人文化產業基金，佔10%。到今年6月尾，招商局基金已注資1.59億元人仔，應佔華人文化產業投資基金7.8%。
成個picture係，招商局基金早著先鞭，早年投資落文化產業度，而喺呢瓣投資總額，最新去到8.8億港元，兼且大部份都未上市。又祖國包括電影在內嘅文化產業火熱，招商局基金第時嚟自呢瓣分成，或者呢批投資上市，釋放價值，肥過肥仔水！
招商局基金半年（6月底止）成績單話，為免承受嚟自股市更大的風險，所以，上半年係無參與過股票買賣。策略上，或者保守咗，但掉頭睇，招商局基金係無受呢潮跌市影響，而基金到今年8月尾NAV，keep喺32蚊，現價（12.58元）潛喺1年底，得0.39倍PB。
又家陣佔招商局基金最大投資比重嘅上市分部，包括招行（滬600036）同興業（滬601166），PB講緊1倍。而8月24號主打嘅橙天嘉禾（1132），周一再受兩巨頭合組「旗艦影業」消息刺激，繼續放紙鳶，計由8月尾到家陣，大升近60%，PB貼近1倍。
招商局基金比邊瓣，PB都係平咗一大截！冷灶煲一轉，當PB係咁意收窄到0.5倍，招商局基金要升29%到16蚊。
錢雋
細價股專家
本欄逢周一、三、五刊出
錢雋
一周三件 - 錢雋 舊文
