魚樂無窮：監管機構唔該做嘢
■渣打最新已經試緊70蚊，直逼海嘯價。 資料圖片
商品界巨擘嘉能可面臨資不抵債，單日狂瀉三成，引發新一輪商品股大跌浪，三桶油跌逾半成，銅鐵鋼鋁無一倖免，拖累港股再創逾兩年低，二萬大關岌岌可危。商品弱勢唔係一朝一夕，中國經濟弱過藥煲，最新公佈8月工業利潤創史
上最大跌幅，對商品需求有減無增，商品價唔跌都幾難。有分析指，嘉能可或掀起另一場雷曼風暴，如果惡夢成真，噚日嘅跌市只係前菜。
日前提過要小心友邦（1299），話好未完跌穿40蚊，不過渣打（2888）仲陰功，90蚊、80蚊大關形同虛設，最新已經試緊70蚊，直逼海嘯價，無他，渣打手持大量商品貸款，成為今次跌市風眼，說穿了又係中國惹的禍。
大股牙煙，細股更可怕，全配售上市嘅立基工程（8369），上個星期五首日掛牌狂升58倍，成為一時佳話，點知噚日仲癲，大升63%後再倒跌95%，用史上最瘋狂新股形容絕不過份。上星期喺高位14.88元買咗一萬股嗰位人兄，如果收市仲未沽，投資14.88萬，而家只係得番2,550元，大縮水98%，唔少妖股供供合合多年嘅效果，立基兩日就搞掂，問你怕未！港交所（388）打開門做生意，預咗有人搞搞震，這亦曲線反映香港自由嘅可愛之處，但唔代表監管機構可以坐視不理，人家擺明當你透明，你仲唔做嘢等幾時？
唐牛
https://www.facebook.com/tongcow88
唐牛
魚樂無窮 - 唐牛 舊文
