嘉能可風暴
2015年09月30日
港股放中秋，美股就來個明月照溝渠，星期一借住礦業股唔靚仔，插到反艇，杜指收市唔見三百點。港股昨日期指結算，淡友自然唔客氣，一開就隊低八百點，已是意料之內，結果收市跌咗六百幾點，都跌得幾應吓。
今次跌市最直接死因，是商品價格大跌，交易商嘉能可(805
) 股價大跌，市場擔心掀起礦業版「雷曼風暴」，恐慌升級，觸發連鎖反應。嘉能可據報負債近300億美元，投資者擔心公司價值及還債能力。Investec公司警告，若商品價格持續低迷，該公司又沒實施重大整頓措施，股東價值可能所剩無幾。
銅價暴跌 新興市場無運行
嘉能可為了擺脫窘境，已實施100億美元減債計劃，包括發行新股籌資和暫停股利發放，但高盛公司上周指出，縮減債務和支撐資產負債表的措施仍然不夠。嘉能可市值從去年7月高峰已銳減400億英鎊，是英國富時100指數中表現最差的成份企業。
投資者可能記得，大約一個月前陸羽仁曾經講過呢隻股，話佢財政壓力好大，籌集資金之餘，前景仍然好唔穩定。上星期國際銅價大插，業界風聲鶴唳，嘉能可首當其衝，股價暴插，仲令人擔心會有連鎖反應。依家危機浮面，生產礦石的澳洲公司都中招，當地普通股指數收報4964點，跌咗3.5%。
國際銅價回落，最直接需求急降，特別係中國經濟放緩，令市場供過於求趨向嚴重。雖然銅價急跌後，有礦業商宣佈減產，但市場憂慮未能止跌，主要係現時銅價仲未跌穿生產成本，特別係美元強勢，令部份匯價急跌的生產國，仲有水位可走，故此市場銅價仍然係偏熊。
喺呢個憂慮下，市場擔心嘉能可資不抵債，上日佢在倫敦股價挫29.4%，本港股價亦大插，收報8.68元，瀉30%，同時引發一眾資源股狂瀉，哈薩克礦業(847) 暴瀉37%，收8.8元，內地資源股已經好啲，江銅(358) 降4.7%，報9.23元；中鋁(2600) 跌3.25%，造2.38元。另外，市場擔心商品價格大跌或累渣打(2888) 資產質素，全日收報72.85元，瀉6.8%，頗有火燒連環船的味道。
要留意係，港交所(388) 昨日跌咗2%，報177.7元，佢名下有倫敦金屬交易所(LMX)，雖然佢只係提供平台，但如果金屬市場唔好，點都會對業務有影響。港交所業務係獨家性質，加上無負債兼派息比率高，故此係好多股民撈底首選，但喺影響未明朗前，都要留意吓嘉能可風暴會否吹襲埋佢。
相對於金屬商品，油市情況無咁差，大型油企實力比嘉能可強，但原油供於於求暫時未有改善，中資三桶油分別跌6、7%，短期油股都要列入警惕類別。
特首想大力推低樓市
港股喺期指結算日，一度大跌逾八百點，創逾兩年低位，全日勉強守住9月8日低位20524點，恒生指數收造20556點，挫629點；國企指數收報9230點，挫281點，下跌股份逾千四隻，成交增至840億元。有分析話，銅價唔好反映中國經濟同新興市場唔掂，依家好多基金經理都退守美歐成熟市場，所以一有風吹草動，新興市場就變得弱不禁風。
港股唔靚仔，美息又有向上陰影之餘，特首昨日仲出來踩多樓市一腳，話明未來供應雖然增加，但佢就無打算撤銷辣招，好明顯係想借住市勢唔靚仔，大力推低住宅樓價，向市民交吓功課，如果全球資產市場繼續衰落去，佢成功機會就大增喇。
陸羽仁
金融High Tea 舊文
