魚樂無窮：樓市莊閒大執位
■時至今日，股市一年半載難有起色。 資料圖片
無殼蝸牛最期待嘅畫面出現了！中港股市跌跌不休，樓市不敗神話似有動搖跡象。繼上車新盤連環撻定後，豪宅盤如貝沙灣及維壹亦有劈價撻定個案，另一邊廂，四叔新盤突然減價一成，要錢唔要貨味道極濃，二手亦漸現低市價成交，種種跡象
顯示，樓市莊閒家正式執位。
樓價大升浪時，業主係莊，買家係閒，前者總係吊高嚟賣︰市價400萬，放盤叫價480萬，足足叫貴兩成，政府辣招令供應大減，準買家只能夠跳價搶貨，你唔買？大把人爭住要。做業主好過去搶？樓嘅嘢，一買一賣，公平交易，你情我願，誰也怪不了誰。試想想，如果你三年前喺一片見頂聲中搶貨，而家賬面計依然賺到笑。時至今日，股市一年半載難有起色，零售市道進入寒冬，支撐經濟兩大支柱斷曬，樓價短期出現跌勢成為市場共識，你係買家會點？當然係觀望啦。業主呢？態度肯定會軟化。真人真事，身邊正放盤嘅朋友，原先叫高一成，幾日後已改為用市價放盤。冇實力嘅業主，割價求售係唯一選擇。用股市術語講，「個棚就嚟冧，有買盤梗係不問價沽啦！」買家重新做莊，奪回話事權。
核心問題︰而家係咪上車良機？升跌還升跌，上車還上車，唐牛看法一直不變︰遇見心頭好，計過數供得起，幾時都係買樓時機！
唐牛
https://www.facebook.com/tongcow88
唐牛
魚樂無窮 - 唐牛 舊文
