一周三件：
青島港銀彈多
■青島港今年與不同港口簽署友好港協議。圖為集團董事長鄭明輝。 資料圖片
青島港（6198）貼近上市底，手頭淨現金係H股市值嘅兩倍，未計一帶一路威力，嚟緊兩年預測PE，又係行家中至平，有得諗。
密密部署一帶一路
青島港到今年6月揸現金62.6億元（人仔．下同
），隨住集團揸50%嘅日照港集裝箱股權處理，一項待收款3.2億元搞掂埋，青島港現金將達66億元。扣埋同期借款同應付股息12.3億元，青島港淨現金仍然去到近54億元，折約65億港元，係家陣H股市值32億港元嘅兩倍。青島港銀彈勁多，唔怕個市風吹草動。
青島港現價（3.81港元）潛近上市底，往績8.5倍PE已經唔係貴。場內專業評估，青島港今、明兩年EPS0.47港元同0.5港元，兩年預測PE，再跌得7字頭單位數。行家大連港（2880）明年預測17.7倍PE、天津港（3382）9倍PE、廈門港（3378）10倍PE，連埋祖國上市行家計，明年預測15倍PE，青島港平一半！
青島港基地青島市，係一帶一路5條海陸路線中4條的始發點。又由阿爺推一帶一路，青島港喺今年嚟，先後同巴基斯坦瓜達爾港、柬埔寨第一大港西哈努克港，簽署友好港協議。集團亦進一步強化海鐵聯運，兼打造全亞洲第一個自集裝箱自動化碼頭。青島港唔係坐喺度等飯開，而係為一帶一路密密部署，而隨住呢壇製作開波，青島港喺行家當中，係彈出嚟。
咪扯咁遠，睇硬數據，青島港PE平過行家一大截，冷灶已經有值得煲嘅理由。當青島港中線翻半番到5.7港元計，明年預測PE先得11倍，未有耐追到行家平均值。
錢雋
細價股專家
本欄逢周一、三、五刊出
錢雋
一周三件 - 錢雋 舊文
