異動空間：
北控醫療撻著了
聯儲局講明下次開會可能加息，睇怕真係就快要加，但一日未加，個市始終有壓力，想升得爽啲都唔得，就如近排港股咁，成交疏、冇鑊氣，陰住跌穿10日線，落場宜抱打遊擊心態，炒股不炒市。
日前推介的國農控股（1236），悶咗幾日失驚無神就起動，如果冇耐性坐兩日就走咗
，就會錯失獲利良機。值得留意，由於貨源歸曬邊，一係唔行，一開波就停唔到，係咁喪升，望嚇去年2月及今年5月的走勢，自然一清二楚。
一孩政策令中國人口老化，養老、醫療行業勢將迎接「黃金十年」，揀隻錢多、後台強勁嘅去炒，北控系唯一上市醫療平台北控醫療（2389），係首選股份。北控為北京市國資委直屬窗口旗艦公司，比同業有著數。北控醫療近年多番賣產集資後，手握逾27億元現金，準備大展拳腳。
產業佈局上，集團最大優勢係可向北控收購平地發展，大搞養老院、醫院，目標2018年在北京建百家養老中心。技術方面，近月先後與多家企業合作，進軍心血管、腫瘤、糖尿病等醫療範疇，另再投資互聯網醫療平台，業務模式相當清晰。走勢上剛於橫行區崛起第一棍，好戲應在後頭！
魏力
http://www.facebook.com/2012jason
魏力
異動空間 - 魏力 舊文
