中環在線 - 李華華 2015年10月30日
中環在線：
施俊嶸6呎高 表現淡定
施永青被阿仔搶風頭
■施永青（左）同阿仔施俊嶸都有6呎高，都幾有台型。 黃嘉銘攝
中原集團創辦人施永青每次現身，都被傳媒追問樓市走勢，輕易成為焦點，但噚日佢就俾細仔施俊嶸（Alex）搶走唔少風頭。27歲嘅Alex有6呎高，屬高瘦型，同施永青幾乎餅印一樣。
中原同系嘅利嘉閣噚日推出一個叫做「智能語音搵樓助手」嘅手機app，有關系統就係由現職利嘉閣資訊科技發展總監嘅Alex負責。
■施永青大女施慧勤（右）今年初嫁咗畀老外，現做少奶奶。 資料圖片 私人問題有問必答
呢位地產界名人第二代，官仔骨骨，噚日佢首次主持記者會兼做埋產品介紹，表現十分淡定。施永青出名talk得，施公子亦都掂，喺台上講足十幾分鐘，都冇乜冷場，施永青都讚阿仔講得好過自己。
施永青笑住咁話，阿仔每次都「有備而戰」，唔似自己「講講嚇，唔知講咗去邊」，佢又繼續賣花讚花香話「如果公司請人，請佢好過請我」，真係錫仔錫到出曬面呀！
施公子的確友善，對於私人問題都有問必答，講曬自己履歷，原來佢之前喺新地（016）任職項目管理4年，主要跟內地項目；加入利嘉閣半年左右，係佢人生第2份工。被問到加入利嘉閣係自己興趣，還是爸爸安排，佢笑笑口話「兩樣都有喇」，認真坦白。
講番佢搞嘅新app，Alex話非常滿意呢個作品，今日開始可以下載，可以幫人盡快搵到地產資訊。
Alex短期將會集中做好資訊科技部份，希望以用家身份，為客戶提供更方便服務雲雲。
【施俊嶸小檔案】
‧27歲未婚
‧學歷英國華威大學經濟系畢業
‧2010-2014年任職新地項目管理
‧今年4月至今利嘉閣地產資訊科技發展總監
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
