兩件一周 - 錢雋
1168再食息無著數
2015年10月30日
百仕達(1168)手頭淨現金高達28億銀，喺雙降情況下，揸Cash收息，愈嚟愈奀，現金牛要搵發財路數。
百仕達到今年6月尾，揸現金近30億銀，得借款2.2億銀，淨現金28億銀，幾乎係總市值水位。百仕達無細分存款數額分
部，但講咗大部分係人仔、港元同美金。都咁睇，喺高息年代，百仕達現金多，單係食住利息收入，都好和味。
但港、美長期keep住低息，而美國話加息，講緊N時，嚟緊日子，就算真係加，都無條件加得多。呢邊廂，阿爺放水救經濟，keep住雙降，即係話，嚟緊日子，連人仔存款息率，亦一路減少。
再睇姐妹系威華達(622)，上年以嚟，透過運用手頭銀彈，進行證券投資，亦因為呢瓣發力，到今年6月尾，資產大升值近40%，到60.5億銀。百仕達淨現金，係威華達2.8倍，一樣可以好似威華達咁，利用超級銀彈優勢，去壯大資產同搵真銀。
百仕達近年無售樓收益，講緊過百倍市盈率，但現價(0.87元)市帳率(PB)0.4倍，有唔錯折讓墊底。又百仕達喺上海長寧區「寧國府邸」呢個超豪項目，總面積雖則得146萬方呎，但肯定寸金尺土，隨住呢壇製作明年下半年搞掂，百仕達資產增值，肯定係以斷十億咁計數。
呢轉煲百仕達，當追番上威華達0.56倍PB水位，係講緊要升38%，到1.2元。
作者為中細價股專家
回首頁
兩件一周 - 錢雋 舊文
