智取大市：
美股花招似平實貴
法國恐襲之後，歐洲股市噚日早段依然能夠回穩，投資者似乎未將連環恐襲放在眼內。不過，喺呢一刻，晉佳最關注嘅，唔係歐股亦唔係港股，反而係美股。
基本因素撐唔起
2011年歐債危機之後，直至2014年底，標普500指數呈現一浪高於一浪嘅升勢，但由今年開始，標
普500指數開始由一浪高於一浪，改變為橫行走勢，再經歷8月一輪大震倉，10月反彈之後，喺2100點以上又見到阻力，圖表上醞釀一個大雙頂，購買力逐漸轉弱之下，跌起上嚟唔講得笑。
美股轉弱，在於基本因素嚟講，絕對大條道理。近年有一個值得留意嘅現象，就係分析員計美股估值時，往往以非GAAP基準去計算盈利，再得出市盈率，目前已成為主流，甚至完全取代以GAAP基準計算盈利。
以非GAAP基準計算盈利，主要係撇除咗美股上市公司向員工派發認股權等等項目涉及嘅非經常性開支，所以非GAAP盈利點會比GAAP盈利為高，高出幾多，因股而異。
例如以GAAP基準計，facebook預測2015年市盈率成100倍，但係以非GAAP基準計嘅市盈率只有50倍，配合每年盈利增長超過30%，大家就會覺得facebook估值合理。如果你仲用緊GAAP基準去計美股估值，呢一刻一定大把人跑出嚟笑你唔入流，但在於晉佳而言，呢個絕對係不可不防嘅警號。
回想起2009年3月，香港上市嘅銀行股大跌，滙控（005）供股大家一定記憶猶新，當時大家未必有為意嘅，係分析員紛紛轉用有形資產去計算市賬率，取代一般以整體資產去計算市賬率，目的係為咗將超低殘估值合理化，所以用一個不尋常嘅估值方式，去自圓其說，令大家覺得銀行股仲有得跌。結果證明分析員過份悲觀，從嗰一刻開始，銀行股見底回升。
人類總要重複同樣的錯誤，美股以取巧方式嘜低估值，呢一招已經玩到爛，基本因素絕對支撐唔到美股。
要喺美股市場裏面搵PEG低過1嘅股？相信有一定難度，連可口可樂呢隻連續幾年盈利下跌嘅股，都賣緊10幾倍市盈率，都仲有人話佢平。事實上，唔少30倍市盈率以上嘅股份，預測盈利增幅只得10幾巴仙，20倍市盈率以上嘅股份，盈利增長唔多過10%，你可以想像美股估值幾咁飽和。
因為唔少美股估值超高，所以資金唯有收窄收集對象，去到想像空間極高嘅科網股，因為你大可以話facebook有無限想像空間，點吹都值；一係就買最穩陣嘅日用品消費股，包你輸唔死；至於其餘股份，點睇都係跌多過升。難炒，已經成為全球大趨勢，下一站，美股撐唔住，至於港股會點，都係難以樂觀。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文
