跌市有護墊
2015年11月17日
美股上周五低收，港股一開就插，雖然收市跌成385點，但最終成功死守住兩萬二千點。說到底，恒指由差不多兩萬三千多點撻番落嚟，回了千八點，調整已有一定深度，加上6月A股暴跌一役，令大家警覺性大為提高，股市係炒預期嘅地方，當大家有咗準備，壞消息殺傷力就會稍為降低。
港股昨日插完後定住，主要係內地股市無跟外圍急挫，最後仲升了0.7%。內地過去兩個月落咗唔少重藥，包括增加銀行認可的抵押工具、減息降準。由A股的表現看來，中央不斷托底，似乎開始收到補底的效果，雖然個市暫時無得大升，但在3000至3300點之間，形成一條防線，唔會隨便就插穿。
離岸人仔急彈
技術上嚟講，港股喺7月份俾A股拖落嚟，好多重倉都震咗出嚟，亦都增加咗港股避震力。
美股上周大瀉逾兩百點，再加上巴黎遭連環恐襲陰霾，恒指昨日低開裂口低開438點，開市已跌穿50天線，亦是今早低位所在，更跌穿22300至23400點重要橫行區，一度挫逾四百點，失守50天線(22156) ，不過隨住A股回穩，帶領港股收窄跌幅，恒指險守兩萬二收市，全日波幅僅169點，收造22010點，挫385點或1.72%；國企指數更穿一萬點大關，收市挫1.99%收市。成交金額769.5億元。
騰訊(700) 與友邦(1299) 為跌市火車頭，兩股已合力質低恒指100點。騰訊跌2.04%，報149.1元；友邦降2.83%，報46.3元。內地上調融資保證金，內地券商股遭拋售。海通證券(6837) 挫4.83%，報14.2元，跑輸一眾國企指數成份股；中信證券(6030) 降4.21%，報18.2元；銀河證券(6881) 瀉5.16%，報7.35元。
昨天仲有個值得留意嘅現象，就係人民幣離岸價一度急升，在下午兩點半的十五分鐘內爆升超過200點子，呢個情況若不是人為干預，就令人聯想到國基會討論人仔特別提款權(SDR)好事近。宏利資產管理國際投資組合方案部主管王悅新(見圖)就認為，若人仔在季內獲批SDR，可以抵銷近期資金流失的情況，對中資金融股係好事。
王悅新話，如果市場對於中資股估值，因為特別提款權而調升，港股受惠會比H股明顯，因為H股息率較高，容易吸引資金。對於王悅新嘅講法，陸羽仁有同意，亦有唔同意嘅地方。同意嘅係，SDR有助改善人仔資產的估值；唔同意嘅係，港股得益係咪一定大過A股！
我覺得，內地A股和香港H股係兩個唔同嘅遊戲。A股主要係內地人參與，佢哋主要睇前景，着重政策走向，對股息收益唔係咁着重；H股國際投資者參與多，佢哋傾向睇重經濟和股市基本面，股息回報亦係考慮點之一。所以人仔對國際投資者的影響，最主要睇消息能唔能夠拉動佢哋對中國經濟的信心。
SDR另一個作用，就是緩和強美元造成的走資潮。最近油價、金價，以至商品價格都穿晒底，和陸羽仁近日經常講的美元效應直接有關。美元強，所有資金由新興市場，甚至歐洲回流到美國，新興市場經濟離不開農產品、原材料，能源，甚至連澳洲、加拿大這些「工業國家」，基本上都係食呢條水。美元強，資金由這些國家流出，造成當地貨幣和經濟轉弱。從美元過去匯價，最強曾經高過歐羅睇，現時升幅仲有水位，因此我恐怕商品這個跌浪還未完。
低吸中資股玩彈牀
內地經濟其實已算好啲，因為她是世界工廠，她生產減少，可以停買人家的原材料，雖然如此，都仍然相當難捱。依家阿爺力谷人仔國際化，特別是加強在亞洲區內流通，當人仔流通增加，中國就可以透過用人仔提供融資，輸出過剩的生產力，拉動經濟。由於有咗SDR做跌市的保護墊，如果個市插得急，可以執點中資大股玩吓跳彈牀。
不過呢的市道，買紅色大股，食到10%相當唔錯，空間較窄，入位要平，有胡要食，唔好要求太高呀。
陸羽仁
金融High Tea 舊文
