女神tea time：
狗仔粉與福臨門
■新煮意今年收購發記甜品股權，噚日再講擬收購「十八座狗仔粉」。 資料圖片
最近識咗個喺餐飲業百足咁多爪嘅老闆，茶仔、西餐、打邊爐乜都做。傾落偈先知，原來咁多瓣，打邊爐就最難做。唔知係咪因為餐飲太難做，Margin太低，近年唔少
餐飲都由本來賣嘢食，順手啤隻殼上市賺快錢。好似經營Italian Tomato嘅惟膳（8213）、持有季季紅、發記甜品嘅新煮意（8179）先後傾過賣盤。
講開隻新煮意，又真係非常傳奇，賣乳豬起身，2011年上市大炒突炒。今年收購發記甜品股權，噚日再講擬收購「十八座狗仔粉」。係嘅係嘅，季季紅本身已獲米芝蓮推介，加埋狗仔粉仲唔係如虎添翼？你就想！一年你會食幾多次有米豬呀？狗仔粉一碗賣幾銀？賺到幾多錢？而家講緊佢未經歷噚日洗倉暴跌，係6億元市值，跌完都得返3億元，叫做係殼價。明明條街應該冇曬貨，都可以咁跌法，認真有古怪，我就唔敢玩了。
與其玩狗仔粉，福臨門都係米芝蓮星級食府啦！如果唔係揀大眾平民轉台快嘅餐飲，咁梗係揀隻毛利高嘅華人飲食（8272）。華人飲食目前市值只有3億元多啲，同樣都係殼價，華人飲食圖表上造緊旗，可以冷敲。
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文
