節後防出貨
2015年11月12日
內地股市升咗一段，昨日上上落落，港股跟住波動，一度受壓跌得較多，好彩最後創業板指數飆逾2%，帶領上證尾市拗腰回升9點，港股算係穩定番。
港股頹勢未改，恒指輕微低開7點報22394點，早段反覆回升，一度揚78點，午後內地公佈經濟數據後更掉頭下跌，最低見過22324點，收市再跌49
點，收報22352點，險守22300關，連跌五日累挫701點。國企指數收報10245點，跌69點或0.67%，成交金額縮至725.6億元。
藍籌股個別發展。騰訊(700) 績後升0.73%，造151.5元；港交所(388) 上季盈利大升八成，股價反跌1.04%，報209.8元。近日弱勢的本地地產股反彈，長實地產(1113) 升2.08%，造51.55元，是最叻藍籌股；周大福(1929) 發盈警，股價創上市新低，收造6.17元，插7.08%。
11月11日，內地整咗個光棍節，仲慢慢變成網商銷售嘅重要日子，甚受國際關注。過去的光棍節，網商陸續公佈銷售數字，阿里巴巴話佢中午銷售有五百幾億元人民幣，多過去年應不成問題，市場估計就要超過八百億元。要留意反而係增長係咪達到預期，同埋更加重要係，會唔會有好消息出貨現象。
網商要搞期望管理
光棍節係網絡商諗出來的絕世好橋，刺激起消費者購物衝動，現代人買嘢，十居其九唔係必需，好多時係想買就去買，所以點樣令佢哋想買嘢，係做生意最大學問，網商齊齊推出呢招，喺聖誕前搶食傳統零售大餅，的確係幾高。不過，呢個節日依家亦變成網商的考題，而且答題難度一年高過一年。
有參加今年做節安排的網商高層坦言，大家密謀砌高條數，但做得到相信增長速度都唔易維持，所以要一併控制埋外界期望，唔好年年拼數字，仲要睇埋創意。聽佢咁講，似乎佢對考試攞高分都唔敢有過份信心。睇番阿里股價，佢喺過去一個月由70美元邊剷上85元，呢幾日回番去82元樓下，跌幅略為大過市場，原因相信同佢有侵權官司有關，同時亦有少少光棍節前派成績表的焦慮效應。
至於另一隻科網龍頭騰訊(700) ，股價表現較穩，佢公佈第三季業績，市場收貨，股價造好，升咗1.7%。美資大行摩根士丹利認為，騰訊(700) 第三季非通用會計準則淨利潤率按季下跌3個百分點至31%，主因發展流動支付，須就C2C(客對客)轉帳承擔銀行大額手續費，加上投資節目版權，遊戲及視頻內容牌照成本上升。
騰訊第三季品牌展示及效果廣告收入增長理想，該行相信，廣告業務收入持續增長。大摩仲指出，儘管騰訊須就流動支付業務承擔高昂手續費用，但用戶增長迅速，截至9月，已逾2億用戶綁定銀行卡帳戶，較去年底倍增，重申增持評級。
fb創投股東套現
喺美國加息陰影下，科網股係較不受息口影響的板塊，用內地術語講佢哋係輕資產公司，對利率無咁敏感。不過，最近持有facebook的創投股東Andreessen披露，趁FB股價過百美元賣了一半股權，佢係創投專家，套現賣股另作投資好正常，科網股股東愈賣愈高，過往都有不少先例，最多人講係騰訊大股東馬化騰，老早已經減持股份。在這班聰明腦袋心中，公司發展全靠他們的創意，有股無股唔太影響話事權之餘，佢可以不斷再收紅股，喺咁情況下，點解唔賣股收番真金白銀先呢？
陸羽仁
金融High Tea 舊文
