女神tea time - Fifi 2015年11月12日
女神tea time：嬰孩股漏網之魚
■二孩政策出台後，唔少相關股都彈起，不過大家可能睇漏海爾智能健康。 資料圖片
近來細價股當道，殼股翻生。坦白講現時個市，彷彿已經好耐冇咩人講基本因素。同人講PE，人哋反而同你講幾多日升到幾成。呢個情況，似乎喺A股當炒下，情況更為嚴重。
更重要係，深港通將包埋創板股！內地創業板今年以來升咗87%，估值係滬綜指嘅4倍。證明大陸錢炒創板係癲。創板股炒作講求嘅係故事，開正內地散戶嗰瓣。唔知香港創板會唔會有份，如果有，到時港交所（388）恐怕變成妖股嘅天下，啲升得急、跌得狠嘅神仙股，應該比現時更加氾濫。
二孩政策出台之後，令唔少相關股都彈起，不過有一隻大家可能會睇漏眼。海爾智能健康（348）自從俾海爾收購後，已成為一間專賣兒童、嬰兒產品，好似嬰兒消毒器、嬰童空調、嬰童淨水器之類。同時，更同全球最大母嬰服務平台「寶寶樹」合作，研發母嬰家庭智能終端產品，即係設計個可以控制家電嘅App方便照顧BB，連「互聯網+」概念都食埋。
公司最近發盈利警告，料中期盈轉虧，收入同毛利都下跌。但公司正值轉型，所以業績未反映公司新業務實力。股價近期低位有支持，可以趁機收集。
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文
