魚樂無窮：四個字炒起一隻股
■盛明國際逆市炒高半成，成交大增五倍。 資料圖片
港股五連跌，兼有兩日未能企穩22000點樓上，走勢肉酸。2015年將盡，大家都在埋數，減少出手，有心人要舞上舞落更加容易，仍在搏殺嘅戰友，記住要幫自己計計數，定好全年止賺位，一旦觸及警戒線，便要果斷離場，
否則陰啲陰啲，盈利好快會化為烏有。要記住，大時代真係千載難逢，唔知幾時再出現，未來贏錢只會越來越難，有疑問持現金準沒錯。
埋單雖只跌百點，但全日計有逾千隻股份下跌，絕對唔係好兆頭，從另一角度出發，能夠反地心吸力嘅股份，肯定有番咁上下本領，可作為短炒對象。盛明國際（231）逆市炒高近半成，成交大增五倍，有啲嘢！原來公司上日發通告，建議易名為平安證券，簡簡單單轉四個字，即令股價飛升。
翻查資料，公司9月完成收購Grand Ahead Finance，旗下全資附屬正是平安證券，改名只是前菜，好戲卻在後頭。雖然非屬平保（2318）旗下，但業績卻不賴，截至今年2月底止，5個月錄得2,277萬元盈利，唔好忘記，呢條數還未包括大時代嘅生意，全年計肯定更和味。加少少想像力，平安證券持有現時最吃香嘅9號牌（資產管理），隨時成為內地券商嘅收購對象，有意思！只要突破牛熊線0.21元水平，相信會成為另一片樂土。
唐牛
https://www.facebook.com/tongcow88
唐牛
魚樂無窮 - 唐牛 舊文
來源 source: http://hk.apple.nextmedia.com
