唱淡人幣添壓力
2015年12月10日
人仔匯價腳軟，搞到中港股市都氣虛血弱。中國外匯交易中心公佈，人民幣兌美元中間價，較前一交易日跌62點子，報6.4140兌1美元，創2011年來新低。內地交易員指，在岸及離岸人民幣差價一度超過800點子，令套利盤再蠢蠢欲動，再次加劇在岸市場貶值壓力，市場目前關注是6.45兌1
美元關口會否有支持。外資大行好似法興就話，人民幣貶值預期趨勢已經形成。
大行預期資金加快流出
在人幣入籃前，已有傳言入籃後人仔匯價需要更市場化，外資會喺好消息公佈後動口又動手，呢兩日果然見到有大行出報告評論。美林話，人民幣獲國基會(IMF)納入特別提款權(SDR)貨幣籃子後，中國當局一如市場預期，已毋須再入市干預，維持匯率穩定，該行估計11月人行動用800億美元入市支持人民幣匯價，較10月增加4倍。不過，美林相信人仔匯價若下跌，人行不會坐視不理，因資金持續流出加上經濟未有起色，容易觸發金融震盪，雖然當局可以容忍人民幣更大幅度雙向波動，但會避免單邊貶值預期升溫。
大和證券就直接話明，明年資金流出內地趨勢會加快，預期經常帳逆差，未來兩年會達到3900及3000億美元，外匯儲備到明年及後年底會跌至2.8萬及2.3萬億美元，即較現在跌33%。
我有個朋友在8月匯改時專門坐飛機回內地，將存深圳的人仔換番港紙調回香港，如今見人仔匯價再創新低，佢笑笑口話當日張機票無白花，因為老婆8月時日日不斷問人仔匯價，唔換番港紙，依家真係唔使瞓。
匯價效應對股市都有影響，恒指跌101點收場。內地航空股升完一日，唔理油價低殘掉頭跌，例如國航(753) 就大跌3.8%。揭盅原因係驚人民幣貶值，內地航空股收入係人民幣，但買飛機係畀美金，所以自從人民幣貶值後，就算油價回落，內地航空股升勢都無以前咁靚仔。短期而言，投資者要對人幣匯價敏感股提高警惕。
理論上，人民幣貶值對出口股或工業股有利，因為匯價平咗，成本減輕，對邊際利潤有幫助，但實情係咪咁呢？
陸羽仁同一位銀行家傾起，佢話最近好多廠佬叫苦連天，大喊雪上加霜，皆因生意難做之餘，仲輸人民幣輸到七彩，有人仲輸到「摺埋」，若然人民幣跌勢持續，可能仲多廠佬頂唔順。
廠佬中招輸大錢
銀行家話，內地自從實施勞動法，成本年年上漲，搞到做廠年年難過，好多廠佬如果唔係無錢一次過遣散，老早就劈炮，有啲人亦搬廠去越南、印尼。過去廠佬做廠之餘，亦炒炒人民幣升值，他們買的不是一般人仔保本收息產品，而係好似「I kill you later」(Accumulater，累計收益票據)一類衍生產品，呢類產品由於逆勢時要雙倍兼長期接貨，等如賭大幾倍以至十倍以上匯價波幅，過去人民幣只匯價只升不跌，廠佬個個月印印腳收錢，間廠生意點就唔係咁有所謂，但月前人仔急插，好多廠佬手持的「I kill you later」有排未到期，日日要用高價接人仔，就輸到爆廠，有人被迫賣樓，有人要重組債務。
正常而言，經過○九年金融海嘯一役，上市公司投資呢類衍生工具應該極之小心，唔會隨便入貨。如果有上市公司喺人仔匯水上輸大錢，亦都應該公佈，話俾股東知。但如果間上市公司個大股東個人去投資有暗傷，咁就唔係咁易睇到，所以人民幣匯價波動，變成另一個市場對工業股的陰影。不過，?家市場大部份人仍然好似美林所講，相信北京唔會畀人民幣急跌或大幅貶值，大家暫時仲將呢種可能性，列作黑天鵝事件。而個市跌得多人人睇淡，反而係可能就快短期見底的指標。
今日有4隻新股掛牌，當中有3隻暗盤價都係下跌，其中豐盛機電(331) 暗盤價大跌超過兩成，據輝立交易場資料顯示，豐盛機電暗盤收報2.17元，較上市價2.75元低21%，不計手續費，每手蝕580元。
陸羽仁
金融High Tea 舊文
來源 source: http://hdfin.stheadline.com
