金手指：
香港地運近耗盡
■董建華話香港佔國家GDP僅3%，港人應思考香港對中央來說有何存在意義。 資料圖片
幾個禮拜，好多體驗，例如兩個禮拜前我寫咗一篇題為「都會駅買得過？」嘅文。嗰篇文，係用我喺嗰度參選區議會嘅經驗，再重新飾演番財經演員嘅角色而寫嘅分析文章。估唔到，一篇講應唔應
該投資喺嗰度嘅文，居然能拋磚引玉咁令一名都會駅業主投稿去本報網上論壇，寫篇題為「勿侮辱都會駅住戶」嘅文！
意外成英殖民地
有咁嘅創舉皆因我做咗個突破。就係本地傳媒財經版嘅地產組，講樓盤時會好仔細講地區、配套、用料、圖則等。而我嘅突破，就係以「你入住的話，乜人為鄰」做重點，作出一個買賣建議。所以，估唔到我呢個成長於「建華七年之亂」，永遠對樓都係有戒心嘅人，居然能為地產分析破格出啲貢獻。
喺嗰個業主嘅文中，因我選輸咗，兼我唱淡該樓盤，所以僅千字的文章中，「葡萄」一詞出現6次之多。我只可以話，唔好話都會駅，今次選輸之後，連香港都唱淡。
我唱淡香港最主要原因，就係香港地運近耗盡。噚日網上廣傳董建華話「香港佔國家GDP已由回歸時的20%，跌至今日僅佔3%，若日後進一步下跌，香港人應思考香港對中央來說有何存在意義。」冇錯，我都係想講同一樣嘢。
地運，我界定為「攞到啲會令人發達嘅政策」，例如產權保護、能服眾嘅司法制度、合約精神、政府唔強迫人做乜乜物物。簡單一句，我哋1840年代能成為大英帝國殖民地，就係走運嘅第一例子。河口對岸嘅澳門就冇。
當年其實係倫敦官員指示打鴉片戰爭，打贏後，點迫中國開關賠銀都好，千祈唔好割地。點知山高皇帝遠，喺華南地區嘅英帝官員，唔聽話咁割咗香港。不過就係因為逆倫敦意，倫敦決定「懲罰」香港，令我哋第二次走運。下期繼續。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
