減價之聲
2015年12月15日
美股上周五大插，港股以為劫數難逃，恒指大幅低開逾400點，曾經插穿21000點。由於內地股市午後發力推上，港股尾市跌幅收窄，跌幅減至154點，叫做執番身彩。
今個星期聯邦儲備局議息，美股先行插定，理由係垃圾債券大跌，令人擔心加息一旦實行，好多靠發債融資的公司頂唔順會碌低，影響
經濟。華爾街大鱷次次都係聯儲局話加息前插低個市，等班委員開會時綁手綁腳，今次頗有重施故技味道。
政治局要支持房市
不過，上次聯儲局主席耶倫唔加息，已引起鷹派批評，在12月加息機會高唱入雲下，好難唔加。現時市場焦點在聯儲局對未來持續加息的態度，看來大鱷志在逼儲局對未來加息前景保持開放態度，唔好明示會連番加息。
昨日較弱的板塊係內房，早前佢哋升得唔錯，這幾天大力回調，昨天好多隻內房繼續急回，萬科(2202) 跌3.6%，中海外(688) 跌2.1%，恒大(3333) 跌0.4%，算做跌得少啦。
收市後見到中央政治局開會傾2016年經濟的消息，其中提到內地樓市幾吸晴，政治局話「要化解房地產庫存，通過加快農民工市民化，推進以滿足新市民為出發點的住房制度改革，擴大有效需求，穩定房地產市場。」阿爺注意到內地房市積咗好多庫存，但農民工有城市居民身份後，也不一定買得起樓，除非阿爺提供資助。無論如何，講吓樓市都有助穩定信心，起碼顯示最高領導都關心樓市嘛。
重組股好消息出貨
不過炒概念股真係要小心，一見好消息就玩完，好似航運業重組落實，但四隻相關股份復牌，只有中海發展(1138) 一隻升8.2%，其他都是大插，中遠太平洋(1199) 跌17.2%，中海集運(2866) 跌26.4%，中國遠洋(1919) 更大插27.9%。停牌前唔走，好多人要輸錢，中國遠洋跌到3.56元，比低位3.18元相距不遠，等如話炒完散晒。有人話今年初南北車合併咁好炒，因為高鐵有概念，我就話市道唔好人心弱，個個想套現，所以一見好消息就散，弱市炒作艱難。
上海復星集團董事長郭廣昌日前接受內地當局調查，引起諸多揣測。他昨日出現在「復星2016年度工作」會議中，稍為穩住市場情緒，復星(656) 收報12.08元，跌9.5%，比低位11.54元稍佳，但反彈力度唔算好強，由於股價插得唔深，沽貨減磅誘因仍在，短期股價都仲有壓力。復星醫藥(2196) 就跌12%，同低位相差唔多。
反競爭法煩到金鋪股
競爭法實施，各方團體即刻起哄，指向各大集團，油商成為主要目標之餘，手機分銷商就主動減手機價，因為在競爭法下不用再跟廠商的訂價。另外波鞋街的波鞋都有減價聲。金飾零售商都被媒體追擊，話飾金定價劃一有問題，行業團體就聲稱已向競委會申請豁免，但得唔得仲未知。周大福(1929) 股價跌1.5%，高過大市的0.7%，唔知同呢件事有無關。
一般行業受競爭法影響之餘，理論上電力公司就無有怕，係穩健投資難求下，中電(002) 同港燈(2638) 今年走勢仲跑贏好多大藍籌。不過，電力公司今個星期宣佈下年電費，傳言電力公司會凍費。由於能源價格大跌，相信電力公司今年會有相當不俗的燃料費盈餘，社會開始有聲音要電費減價。依家競爭法生效，油公司唔減價成為矛頭所指，電企都會有相同風險。尤其今年生意唔係咁好做，如果來年電費可以減減，對中小企不無幫助，所以買電企博收息的朋友，要預咗佢地股價有啲壓力。以往年尾通常聽到加聲四起，今年因為有了呢條新例，變成氣候異常，加價之聲被要求減價之聲取代。
陸羽仁
金融High Tea 舊文
來源 source: http://hdfin.stheadline.com
