魚樂無窮：事先張揚抵買股
■主打日本城的國際家居指其股價被持續低估，假期前連續兩日出手回購。 資料圖片
踢波落場無父子，炒股更加係六親不認，如果有隻股票白紙黑字話你知，而家好平好抵買，你又信唔信呢？
國際家居（1373）假期前連續兩日出手回購，作價介乎1.07至1.1元，兩日共回購40
萬股。「回購啫，有乜咁特別」？睇真啲，原來好戲在後頭。通告最後一段咁寫︰「董事會認為本公司的股份價值被持續低估。董事會相信本公司現時的財務資源能使其進行股份購回，而仍能於本財政年度維持穩健的財政狀況以持續本公司的業務。」究竟係咪被低估，用數據驗證最均真。
國際家居早預警，中期業績受累經營成本增加、星馬意欲減弱及人仔貶值，結果盈利一如預期大跌53%，至2,110萬元。「年度化市盈率19倍，何來抵買」？睇前景，呢家主打日本城嘅公司未見突出，但若秤身家，則有其可愛一面。公司手頭淨現金3.4億，相當於市值近半，每股NAV0.96元，與現價1.1元比較相距不遠。2013年9月上市，招股價2.81元，兩年累跌超過六成，從管理層角度出發，十分抵買。
還有，上市以來每次放榜皆有息派，今次中期息派5仙，為每股盈利嘅1.7倍，年度化息率達9厘，下月18日除淨前，料有好息之徒搶貨，配合回購攻勢，見底味道甚濃，能否強力反彈？市況決定一切！
唐牛
https://www.facebook.com/tongcow88
唐牛
魚樂無窮 - 唐牛 舊文
來源 source: http://hk.apple.nextmedia.com
