打虎與重組
2015/12/28 09:13:46
網誌分類: 經濟
美股早前拜油價連續反彈四日所賜，上周連升三天，上周四聖誕前夕，美股只有半日市，略為回順，杜指微跌50點，收報17552點；標普500指數微跌3點，收報2061點，納指平手收場，收報5048點。美股上周五聖誕節休市。
對
美股投資者而言，上周可以講係聖誕老人提早降臨華爾街，大派聖誕禮物，雖然來得遲一點，要真係聖誕節才到，但都好過無到。美股上周初連升三日，標普500指數收復全年失地。當然，美股之所以表現咁勁，全賴油價大幅反彈所致。而油價反彈，亦是美息上升令美元向上這個好消息面世後，一個預期中油價壞消息兌現的反動。
紐約原油連升四日，由每桶35美元樓下，反彈上38美元上方，最新報38.12美元，不過，市場目前最大的疑慮係油價的反彈能否持續？瑞銀的紐交所股市操作主管Art Cashin則認為原油期貨仍將下跌，重新試底。他上周接受CNBC訪問時表示，油價上周在一片睇淡之聲大幅反彈，市場已經有人認為紐約油價會跌落每桶20美元。他認為油價過渡地被睇淡，跌得太急，出現短期反彈，好正常，亦令超級淡友付出代價。
紐約油價上周大彈近10%，有人問到會唔會彈上每桶50美元，Art Cashin認為唔會無機會，但油價最起碼要試多一次新低。因為禁運多時的伊朗石油即將出籠，市場上供應突然增多的影響，要等一至兩個星期以後才有分曉。
至於美股前景，他比較關心美國經濟狀況，特別係聯儲局今個月啟動近10年以來的加息周期。而美國經濟實際上唔係聯儲局講得咁好，例如今年聖誕購物旺季，零售業就唔係幾快樂啦，據最新聖誕零售銷售數字，較去年只增加了1.2%，遠差過去年的2.8%增長。網上銷售無疑有很大的增長，但只佔整體零售的不足8%，幫助唔係好大。
摩根大通的全球市場策略師James Liu則預計，隨著美國貨幣政策與全球背道而馳，原油價格下跌的拖累，美企盈利反彈，美股明年會有5%至7%的進賬，不過，這是扣了能源及原材料板塊以後的增長數字，摩根大通預期這兩個板塊將會受到油價及商品價格下跌的拖累。
另外，美國沃頓商學院教授Jeremy Siegel對美股明年的睇法又幾樂觀，佢認為聯儲局明年唔會好似市場預期咁加四次息，最多只會加兩至三次，亦唔相信美國利率會回升到金融海嘯前的水準。他認為聯儲局雖然開始加息，但利率正常化的過程將會是「漸進式」的。所以，美國利率將長時間維持低水準，在這種環境下，美企明年可以做到一成的盈利增長。
不過，我覺得美企今年的情況已經麻麻地，又睇唔到明年有乜特別原因會做得好好，特別係美國加息，美元勢將持續走強，尤其係海外業務為主的美企盈利繼續受到匯率的侵蝕，更重要?係，睇唔到油價已經到底的跡象。所以美企盈利增長能夠同今年一樣，已經唔錯啦。估計明年美股都係上落市為主，杜指18350點的高位，唔易突破。
內地電訊反腐大動作亦值得關注。12月25日夜間，中國電信董事長常小兵被帶走接受調查；26日下午，上級通報中國電信黨組成員，並授命總經理楊傑主持工作。中國電信集團原定於12月28日在北京南粵苑賓館召開的全國工作會，已經臨時通知延期。中紀委後來在27日宣布中國聯通原黨組書記、董事長，現中國電信黨組書記、董事長常小兵涉嫌嚴重違紀，目前正接受組織調查。
中紀委提到常小兵是前聯通黨組書記， 顯示他是在聯通時出問題。常小兵也是自2009年電信反腐以來，級別最高的落馬電訊商高層。令人猜度將為中國通信行業格局帶來巨變，流傳已久的電信聯通是否重組可能好快出現。
本來打虎對聯通以至中電信都有影響，佢地股價難免調整，但有持貨者不宜馬上走貨，小心一個轉身又炒重組。
陸羽仁
回應(1) 我想回應
陸羽仁 BLOG 舊文
來源 source: http://blogcity.me
