中環在線：
屯門新盤命名䨇寓盼吸睛
地產商愛用「煩」體字
教育局早前提議中小學生學習簡體字，引來社會一場熱烈討論，原來本港地產商唔聲唔聲，已經對簡體字投下反對票。此話何解？君不見今時今日嘅新樓盤名稱，唔止用繁體字咁簡單，直情用上一啲睇見都煩嘅「煩體字」㖭呀。
好似香港興業（480）
噚日公佈，旗下屯門新盤命名為「䨇寓」，英文名係「2gether」。華華一見到呢個䨇字，𢱑曬頭，隨即認真走去查《漢語大字典》，原來真係有呢個字。「䨇」等同雙，《字鑑．江韻》：「雙，俗作䨇」基本上，兩個字嘅讀音、意思一樣。
咁點解發展商好揀唔揀，係要揀個倉頡都打唔到，又多筆畫嘅字呢？香港興業銷售及市務總經理史慕蘭解畫話，第一個原因係「䨇」字完全對稱，可以夾番個英文名「2gether」，寓意係呢個盤好適合上車客組織二人家庭咁話喎。至於另一個原因，就係希望引起市場注意同討論，即係市場策略嘅一種，俗啲講，就係想搶focus。
網民：英文名似「易追女」
雖然發展商係想呢個樓盤名令人聯想到Together同相遇，不過口痕友一望就諗到好多其他演繹，好似話「易追女」（2 get her）、「係咪賣畀宅男等佢哋以為買樓後就追到女神」之類。
話時話，發展商為搞噱頭改樓盤名時用上僻字、異體字、古文、甚至日文漢字已經成為香港樓市一個奇景，隨口都數到新地（016）西營盤嘅「眀徳山」，「眀」「徳」二字喺《漢語大字典》都查到，同我哋用開嘅明、德同義。將軍澳城中駅就唔係人人識讀㖭喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
