無減股息執身彩
2016年02月23日
匯控(005) 宣佈2015年全年業績成為市場焦點，早前大行靠估的焦點係佢會否減派股息，結果派息有驚喜，但第四季業績就見紅。
事前有大行擔心去年第四季匯控業績回落，令匯控不能持續派息水平，甚至仲講到佢會強制以股代息，以保留資本。結果，匯控
派息21美仙，比去年同期20美仙有增長。最衰嘅係，匯控截至去年底的第四季，錄得13.25億美元虧損，是公佈季度業績以來首次見紅，第三季就錄得盈利52.29億美元。第四季見紅主要由於貸款減值撥備及其他信貸風險撥備大幅增加1.57倍所致。消息公佈後股價即刻回軟。
激怒股東如同飯碗鬥氣
今年初市場好擔心同油氣企業相關貸款會否拖累銀行業，今美歐股市一度急瀉，但股價急挫期間，美國大銀行摩根大通總裁戴蒙就出手增持。美企行政總裁都係打工仔，佢哋入市買股唔同香港華資企業老闆，護價味道無咁濃，在戴蒙出手後，美國銀行股股價開始企番穩。一般分析認為，油價急滑唔係今日至發生，銀行應該有所準備啦。
至於匯控喺油氣企業貸款唔應該特別多，但由於佢先前流出全球凍薪說法，令外界關心佢是否要減派股息，保留子彈。對匯控高管來說，減派股息甚至凍結現金派息，係下下之策。因為匯控家主要係靠派息支撐股價，同爭取基金股東支持，銀行要集資仲有好多方法，若然減派息激怒基金股東，豈不是等同自己炒自己魷魚，故此大行的估計，如果唔係杞人之憂，就係靠嚇，事實證明，無一個總裁會同自己飯碗鬥氣，夠膽先攞派息開刀。
雖然派息維持，但大笨象第四季稅前錄得虧損8.58億美元；若扣除特別項目，第四季季經調整稅前盈利有19.03億美元，按年下跌33%，數字就比市場估計為差。
喺咁樣消息下，中午股價掉頭跌2.2%，收49.15元，成為包尾藍籌股，所以好彩佢無減派息，如果唔係後果真係幾災難性；旗下恒生銀行(011) 去年多賺82%至274.94億元，連同特別息合共派息5.4元，股價勁揚6.5%，報134.5元。
野村就話，匯控第四季核心收入及核心稅前盈利分別比估計低6%及43%，當中被稱為「炒房」業務的環球銀行及資本市場業務與非亞洲區的傳統銀行業務，以及受減值損失所影響，拖低集團整體業務表現。
摩通續睇47.5元
報告續稱，匯控第四季派息21美仙，符合預期，一級核心資本達11.9%，表現對辦，相信今年派息可維持去年水平。該行維持匯控「中性」評級，目標價5.55英鎊，折合61.25港元。
另一間大行摩根大通表示，匯控(005) 去年第四季盈利較市場預期低，主要因收入疲弱，以及撥備較高。該行估計，市場會因應業績，下調對匯控2016/2017預期。評級「減持」，目標價430便士，折合約47.5港元。
本來，內地宣佈劉士余接替肖鋼成為中國證監會主席，內地A股滬深兩市即應聲齊飆逾2%，港股順勢跟A股升，推動港股升幅擴大至239點，高見19524點，但中午匯控(005) 公佈業績差過市場預期後，限制大市升幅，最終恒指回順至19450點附近窄幅波動，恒指收報19464點，升178點；國企指數收報8221點，上揚108點，成交金額602億元。
陸羽仁
金融High Tea 舊文
來源 source: http://hdfin.stheadline.com
