金手指：
網絡23點嚟？
■網絡23條某程度上是香港官員將美國有關法例硬搬到香港的產物。 資料圖片
啱啱過咗嘅周末，孫柏文去咗吉隆坡舉行嘅亞洲自由論壇做講者。唔知係咪今屆特別提拔新人，所以論壇中好多講座，都屬於入門性質同冇時間性。
但有個講座就貼市。就係關於跨太平洋夥伴關係協議。講者
對協議好有分歧。佢哋嘈得最緊要嘅，就係原來求其攞協議中關於勞工嘅條文，數「馬來西亞一定要」一詞，出現好幾十次，不過「美國一定要」一詞則出現一次咁大把。美帝味濃。
咁點解呢個協議可以咁傾斜？原來美帝官員係由同啲超小國傾先，傾到有結果時就開始𠱁啲中型國入，最後有勢頭時，就同例如日本話：「條文我哋傾好啦，你入就入，唔入就當你唔畀面。」咁樣威逼利誘。
而對我來講，呢個協議最大有兩個問題。第一，以前啲貿易協議，只係講你啲貨、服務係咪可以自由喺另一個國家賣，如果唔係，例如有配額、關稅等，就要降低。不過呢個協議，講例如環保同勞工等範疇，就同外國冇關係，即唔出口嘅嘢都要管。你話我間製衣廠造衫賣畀你美帝，所以要我間製衣廠唔可以係血汗工廠，我明。但連我樓下嗰間茶餐廳做畀我食嘅菠蘿包，流程都要管，咁呢啲仲唔係想粗暴幹預他國內政？簽完後，如果選舉中新國會挾民意想改，就會非常難，所以幹預他國內政是小，侮辱民意改變是大。
第二個問題，就係關於知識產權嘅「保護」。大家都知美帝啲人，最鍾意玩程序。例如一隻藥話到明15年後就專利到期，美帝藥廠只要話「又搵到新用途」就可以延長專利。呢啲「新用途」，仲要好離譜，離譜到狙擊港元嘅Kyle Bass，另一衝擊嘅嘢，就係用美法庭嘗試推翻呢啲專利延續。
而呢個奉承美帝嘅精神，當遇到填鴨式教育產物嘅香港AO，就喺「老師提供model answer」嘅文化中，變成網絡23。來源就係咁，明未？
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
