智取大市：美股驚險之旅（二）
■沃爾瑪（Walmart）今年提升公司最低工資逾一成。 資料圖片
噚日講到美國要面對一項重大的考驗，就係資本主義可能見頂。主張「民主社會主義」嘅美國民主黨總統候選人之一桑達斯，向希拉莉挑機，甚至有機會擊倒共和黨參選人大熱嘅特朗普，成為總統。姑勿論桑達斯能
否成為總統，佢嘅冒起，已對美國資本主義響起警號。
有一單新聞值得留意，就係沃爾瑪（Walmart）今年提升公司最低工資逾一成，理念係加基層人工，基層就會買多啲平價產品，最終幫襯番沃爾瑪，有利業績。呢個現象反映美企需要靠消費力最低嘅基層，嚟催谷業績；更重要的是，沃爾瑪呢個舉動意味著美國的確有趨向社會主義嘅需求。
美國由80年代開始，女性注入勞動力，帶動經濟；90年代開始電腦科技普及化，接棒推動增長；2000年代開始享受中國低成本生產紅利；近年則因環球量寬刺激需求。呢一刻，已去到印銀紙都搵唔到回報可觀嘅投資項目，全人類瘋狂OT之下，勞動力冇提升空間，加上欠缺重大新科技，搵唔到燃料去撻著美國資本主義火車頭。美國總統大選同龍頭企業嘅動態，顯示唔變的話，難有出路。
桑達斯能否成為總統都好，社會主義抬頭嘅憂慮會令投資者聞風色變，剩係驚嚇都夠拖累環球股市，今年內有待跌市去反映美國趨向社會主義嘅可能性。聽日講對港股的影響。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com
