投資先機：都是索羅斯的錯？
■中國金融政策上的錯失，難道是索羅斯的錯？
朋友阿星問我：有冇睇《人民日報》標題〈索羅斯向中國貨幣宣戰〉嘅新聞，國際大鱷索羅斯重出江湖啦，沽空人民幣，令到最近A股大跌！
窮小子：阿星，你確定真係索羅斯做？你有冇見過賊仔打劫會話畀你聽㗎？
索羅斯作為1997
年亞洲金融風暴嘅始作俑者，阿星嘅擔心好正常，但係諗深一層1997年索羅斯出手係不動聲息，今次竟然事先張揚真係好「難得」。中國金融政策上的錯失，難道是索羅斯的錯？熔斷機制本來想防止市場過度恐慌，卻令市場更加恐慌；克強總理暴力救市，卻令股民對A股漸漸失去信心；央行幹預人民幣貶值，卻令人民幣跌勢持續。
貨幣嘅強弱係反映一個國家嘅經濟實力，中國正面臨產能過剩，製造及出口業不濟，債務龐大及政府政策失誤等問題，農行39億元票據虧空事件更反映出中國企業管治十分「兒戲」，如何令市場有信心？人民幣近年貶值正係客觀咁反映中國經濟放緩嘅預期，都是索羅斯的錯嗎？中國唔會好似阿星咁擔心索羅斯沽空人民幣，因為中國正好可以大造文章將人民幣眨值、A股股災、熔斷機制失敗等罪名推在索羅斯身上，為自己經濟金融政策失誤留一個落台階。
歐洲及日本近年擴大量寬，美國經濟未穩定，仍要開始進入加息周期，國際間貨幣戰爭正在展開，中國低勞動成本嘅競爭力被國際對手削弱，阿星你確定真正「元兇」係索羅斯嗎？
窮小子
https://www.facebook.com/poorguyfans.hk
本欄逢周三刊出
窮小子
投資先機 - 窮小子 舊文
來源 source: http://hk.apple.nextmedia.com
