鬆首付 頂經濟
2016年02月03日
港股昨日悶悶哋，稍跌，但內地股市就抽升2%，收市後內地就公佈，降低買樓首套房的首期比例到20%。內地A股昨日彈升，主要係軍工股呢類所謂主題股帶頭，同內房股關係唔大，睇嚟唔係咁多春江鴨事先知道消息提前入市。
內地公佈對非「限購」城市居民家庭首次
買樓的首期由原來的25%，可減至20%，而已有一套房的首期比例調整不低於30%。去年內地已將首次買樓的首期由30%調低到25%，今次再降低到20%，托樓市的動機相當明顯。
樓市唔掂壓埋匯價
傳聞內地會降低首期已經有一段日子，皆因現時內地最大的內需是樓市，要避免經濟過份減速，穩住樓市變成最易見效的手段，所以呢個決定可以話係面對現實下的選擇。
另一個因素，係人民幣匯價受壓，對樓市構成影響，反過來又影響番匯價。為了避免金融風險，可能係阿爺選擇喺春節前出招的原因。社科院財經戰略研究院人員在《上海證券報》撰文指，人民幣貶值所顯示的經濟基本因素是經濟增速下滑，競爭力下降，而國民經濟活動已經不再滿足於國內，兩者不再支持房地產牛市，二、三線城市可能首當其衝。
文章話，若人民幣緩慢貶值，貨幣會緊縮，實際利率升高，樓價會下挫，若果人民幣作一次性貶值，樓價亦會一次性下跌，而若匯率之後能企穩，樓市有望避免受到二次衝擊，可見樓市與股市間的互動。
放寬首付的消息，喺內地收市後至公佈。內地股市昨日造好，滬深兩市彈2至3%，上證指數返回2700關，收報2749點，升60點；深成指數報9610點，升288點，但從反彈股份主力唔係房地產股，估計回升主要係之前跌得深超賣，昨日內地主要升是軍工股等題材股，這類股份是炒作類，顯示大市原本是在春節前炒反彈的局面。
中港股市未反映消息
同樣，港股都未反映呢個消息，市場仍擔心內地經濟走弱，加上隔夜期油急吐，港股全日跌過百點。恒指收市跌148點，報19446點；國企指數收報8058點，下滑86點，成交金額696億元。內銀股沽壓大，建行(939) 造4.58元，挫2.8%；盛京銀行(2066) 挫4.6%，造8.95元。隔夜油價急吐，紐約期油一度大跌7%，創五個月以來最大日內跌幅，石油股又捱沽。
至於內房股好似好股一樣無特別動靜。龍頭中海外(688) 收22.15元，跌1.1%。萬科(2202) 收17.3元，升0.4%，要注意是中海外近期反彈較好，所以昨日回吐，反而萬科早前炒完收購戰散晒，呢排都無乜彈，昨日才升少少。做得好少少的是恒大(3333) ，昨升3%，收5.09元。
股市都係咁，一波波咁嚟，上一波淡友玩人民幣下跌，打到內地面都腫埋，呢一波阿爺玩反攻，除了樓市減首期外，或許仲有一招半式，在過年前壯聲勢，等扮蟹的股民開心嚟過年。不過話得說回來，阿爺出完招，炒完一浪反彈之後，個市是否能持續，都要睇內地經濟得唔得，同美國的利息走向，若經濟未掂美息照加的話，股市還有下行壓力。
以內房股如萬科為例，若咁唔好彩早前炒收購戰時候高位入咗，等佢彈到18、19元時，都要止蝕走人，內地樓市都唔似會「馬上好」，彈完一浸，怕要跟大市又回吐吓。
陸羽仁
金融High Tea 舊文
來源 source: http://hdfin.stheadline.com
