魚樂無窮：研究通告的藝術
睇通告係唐牛每日指定動作，重要性大過睇報紙多多聲，無他，唔少新聞都係由通告演變出來，既然有第一手資料，梗係先睹為快。更重要係，報紙未必cover所有公司嘅通告，尤其係市值細嘅股份，如果你炒慣殼股，一個睇漏眼，後果可以好嚴重，學三師兄話齋，秒秒鐘幾十萬上落呀！
通告往往係一環扣一環，唔可以獨立去睇，好似最近嘅假盈喜真盈警咁，就要翻查以往數據。國壽（2628）出通告話全年盈利增長5%至10%，好似好巴閉，但原來首三季增長超過兩成，證明第四季嚴重走樣，因為單一通告仆落去買，只會變成大戶嘅點心。自問睇通告嘅功力只屬入門級，見到睇唔明嘅，都要周圍問人，但感覺越來越強烈嘅係，越難明嘅通告，炒作機會就越大，絕對值得花心機鑽研。天大石油（839）發通告，法資Vallourec Tubes SAS向內資股東購入50.61%股份，每股作價1.66元，提出全面要約之餘，更會根據去年業績派發特別息，最新價1.67元，又係一個低風險高回報嘅機會。
唐牛
https://www.facebook.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com
