趣BLOGBLOG：滙豐凍薪深層意義
■滙恒全體員工今年凍薪的消息事前無先兆，凸顯管理層決定相當倉卒。 資料圖片
滙豐控股（005）上周六發出驚嚇電郵，通知全體員工今年凍薪。消息一出，不單滙豐及恒生（011）員工媽媽聲，整個銀行以至金融界高層都愕然。愕然的，是事前冇先兆、冇放
風，感覺相當差，也凸顯管理層決定相當倉卒。
越靠內地越跌得甘
去年12月初，當時據悉滙豐只有區域及主管級以上高層今年凍薪，基層員工仍有機會微調，恒生釐訂薪酬總額預算更有約3%增長。殊不知上周管理層開會，突然一刀切凍薪叫停招聘。陰謀論推測，應該是滙控發現了衰嘢，不得不立即節流保命，而源頭非中國莫屬。
金管局上周公佈，本港零售銀行去年稅前經營利潤倒退2.8%，對上一次錄得倒退已是2008年。睇番本港銀行股股價，所反映的，不是港銀會出事，而是出了事。
恒生指數去年高位至今回落34%，本地銀行股跌幅絕對嚇死人，渣打（2888）高位回吐61%、中銀（2388）及東亞（023）瀉逾四成，滙控累跌31%，最好的恒生跌21%。當股價跌得「最少」的滙恒要凍薪，其他港銀難道走得甩嗎？
跌得多的港銀有一個共通點，就是越靠大陸、跌得越甘。東亞2014年內地經營收入佔比達42%、稅前利潤佔比則為32%。在新加坡上市、在中國有相當大網絡的DBS星展，股價亦自去年高位回吐38%。
內企壞賬困擾港銀
正所謂正也中國、敗也中國。當大陸好景時，港銀向國企或民企放貸，壞賬少回報高，但當前中國經濟走下坡，港銀今明兩年會面對大量內企壞賬的困擾。股價唔會等到你宣佈PK時先至仆，而是有序地一仆一碌慢慢向下沉。
2014年底，股榮寫過一篇題為《港銀三萬億黑天鵝》，主要是講截至2014第三季，本港銀行業對中國相關貸款總額增至3.058萬億元，佔銀行總資產14.7%。一年後，港銀對中國相關貸款總額增至3.377萬億元，按年再增一成。以借款人分類，國企佔42%、民企佔20%、其他（如非中國註冊但貸款用於內地）佔38%。只要內地貸款壞賬率有1%，港銀已要撇賬338億元，相當於去年恒生與中銀利潤總和。
網上見到有人將這個不幸情況，用70字生鬼地形容：「港銀借咗好多錢畀大陸，香港人本身冇乜問題，萬一大陸真係出事，借番大陸嘅錢收唔番，銀行就好大鑊。前提係，如果大陸有仆街借錢唔還，香港等仆街。」
滙豐管理層好驚，驚到要一刀切連恒生都凍薪，是否預見有大量仆街，最快22號放榜就知道。早一個禮拜，東亞會率先放榜，希望寶哥哥唔好激動。
股榮
https://www.facebook.com/stockwing1
本欄隔周四刊出
股榮
趣BlogBlog - 股榮 舊文
來源 source: http://hk.apple.nextmedia.com
