中環在線：為港交所3年戰略解畫
小加鹹魚論回敬Webb
■李小加（左）噚日洋洋4,000字，似係回應David Webb日前嘅炮轟。 
有「股壇長毛」之稱嘅David Webb前日發炮批評港交所（388）行政總裁李小加嘅新3年戰略
計劃，真係夾埋都冇咁啱，李小加噚日發表網誌，劈頭第一段就話，對個3年戰略計劃，「有朋友表示困惑……在此，請聽我慢慢道來」，結果就用咗超過4,000字去講解。
對白出自《少林足球》
華華學咗某人嘅速讀神功，好快就由第一段，睇到落最尾一段，發現成篇文最精警嗰幾句就喺最後一段。李小加話：「敢想才能敢拼，沒有夢想，何有未來？」最後佢仲套用港產片嘅一句經典對白：「做人如果沒有夢想，跟鹹魚又有甚麼分別呢？」做結尾。
呢句經典對白出自周星馳主演嘅《少林足球》，戲入面嘅星爺身懷「金剛腿」絕技，但一直懷才不遇，直至佢諗到將少林功夫加足球呢條好橋，於是四出搵番昔日學功夫嘅師兄弟，鼓勵佢哋組軍踢波，創一番事業。
當星爺見到已轉做酒廊員工、身懷「鐵頭功」絕技嘅大師兄黃一飛鬥志全無，就同對方講：「做人如果無夢想，同條鹹魚有咩分別呢？」可惜李小加呢篇文嘅英文版，冇繙譯到周星馳呢句經典對白，否則，華華相信鬼馬嘅David Webb一定會送番條靚鹹魚畀李小加，當係拜年。
話時話，李小加的確熱愛足球，經常跟港交所同事一齊踢波，又不時約外隊作友誼賽。佢同星爺一樣都係踢前鋒，同佢踢過波嘅人就話，見唔到李小加施展「金剛腿」絕技，但佢嘅「鐵頭功」就幾有功架喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
