智取大市：博反彈不如搵好股
■嘉里物流斥資8,792萬美元收購美國十大無船承運商之一；圖為嘉里物流主席楊榮文。 資料圖片
恒指升到20435點，進入舊年9月小雙底20524點同20368點形成嘅第一個蟹貨區，即使去到關鍵位置，朝早係威係勢，食完飯返嚟冇乜力，反映呢個位大家開始忐忑啦。
依小弟嘅睇法，博反彈應該係嚴重超賣嘅時候去博，當指數反彈到9日RSI重返70水平之際，除非趁勢炒即日鮮，否則已經冇值博率。除非你有足夠理由同信心話畀自己聽「呢個係牛市開始」，否則呢個位唔係衝入去，然後坐貨嘅時候。
每一次博反彈，應該係等到投資者信心回復時沽貨；最重要係，究竟呢一轉反彈嘅力度，有冇比原先預想嘅更強，而證明呢個唔止小反彈咁簡單？另一方面，環球經濟狀況同埋消息，有冇證明自己當初睇淡嘅理據有誤？如果冇，呢一刻先要堅持己見，維持睇淡。股份方面，近期中資股大反撲，但係絕對冇人想同呢批爛中資做人世，無論長線又好，保命又好，mon實一批長線基本因素良好嘅股份，更有數圍。
嘉里物流（636）公佈斥資8,792萬美元收購美國十大無船承運商之一，後者提供海運、空運、貨車運輸、報關、物流及倉儲服務。收購聰明之處係項目作為無船承運商，毋須令嘉里物流孭太多資本開支，又能夠為嘉里物流建構船隊；同時喺低油價環境收購，未來經營成本高極有個譜，所以點睇都係高章，呢著證明嘉里物流仲係好股，詳情下期再講。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com
