Money Walker：爆煲只係遲早問題
■當內地樓市好轉，鋼鐵、水泥等商品自然會跟埋回春。 資料圖片
環球商品同股市最近兩個月齊齊於谷底翻生，筆者覺得唔會係長久之勢，但亦認為未必係曇花一現。內地樓市回暖，連同國際油價因憧憬油組減產而回暖，環球風險資產價格齊齊由谷
底反彈，唔少人都質疑情況可以持續幾耐。
撇開油價問題唔講，集中睇中國因素，內地樓市呢排出現小陽春，係大家對中國經濟由悲觀轉為樂觀嘅原因之一。話說喺內地「首付貸」大行其道下，大陸民眾買樓連首期都唔使儲，因為可以直接借。結果係內地一線城市樓市因而進入瘋狂狀態，觸發中央對於泡沫湧現嘅憂慮，並出手調控。
如果大家有留意開內地經濟新聞，就會發覺上述過程似曾相識，喺內地股市同債市都已經出現過。筆者唔敢講內房會走上A股去年先升後爆嘅舊路，但就可以好肯定咁講，大陸已重返由樓市推動經濟嘅舊路。
當內地樓市好轉，鋼鐵、水泥等商品自然會跟埋回春，帶動環球商品市場好轉。所以只要大陸唔介意繼續行返以往推動經濟嘅舊路、唔怕樓市泡沫形成，亦唔理會產能過剩，再加上冇其他外圍負面因素殺出，環球經濟同股市呢輪反彈就可以持續。筆者傾向相信中央為維持經濟，會放鬆經濟改革步伐，喺一定程度上對上述問題隻眼開隻眼閉，唔會重手調控樓市，所以內地經濟短期內唔會太差。基於上述原因，如果單純只睇中國基本因素，呢輪環球風險資產價格嘅反彈未必太快玩完，而實際會維持幾耐，就要視乎中央之後會唔會亂出政策調控股市、滙市同樓市。
當然長遠而言，中國呢種依賴建設推動經濟發展嘅模式根本冇可能持續。即使係一線城市嘅樓市，亦都唔會一直只升不跌，而產能過剩所造成嘅殭屍企業同壞賬問題，最終難免亦會導致內銀資產質素嚴重惡化，引發危機。
大陸好努力發明眾多招數，化解企業壞賬呢個炸彈。不過債轉股、打包不良貸款出售畀海外投資者呢啲招數，頂多只能拖延壞賬問題，冇可能將問題完完全全咁撇除，事關唔會有太多投資者願意長期落疊。中國累積嘅高槓桿問題遲早都要爆，一切只係時間問題。
El.
本欄逢周二、五刊出
El.
Money Walker - El. 舊文
來源 source: http://hk.apple.nextmedia.com
