「劉」市升
2016年03月15日
兩會期間，阿爺表面上話唔會不顧一切出招刺激經濟，實質大力落藥催谷，包括推動樓市，同埋為銀行「債轉股」試水溫。呢的招數長遠係咪得仲未知，短期就利好股市氣氛，中港股市跟住順勢舞高。
長地呢排呈強勢
中證監主席劉士餘日前首度出席「兩會」記者會，之
前佢被人引述在小組會議中勸人買股不賣股，現身時佢澄清自己無咁講過，可能只係鄉音未清引起誤會。更加重要係他講到新股註冊制，強調終要實施之餘，仍需詳細研究，咁即係話短期唔會做啦，呢個講法紓緩咗市場對新股群起湧出的憂慮，加上佢表明現階段討論中證金退市屬言之尚早，以及未來數年不會重推熔斷機制，都係等個市可以唞吓氣，被市場認為係派定心丸。
在劉士餘講話後，內地媒體都相當捧場，整體覺得佢較尊重市場。《第一財經日報》以「低姿態的改革者」形容佢，《證券時報》話佢「作風務實，有利內地資本市場健康發展」。唔理外界對中證監呢位新主席的好評係咪因為仲喺蜜月期，喺新官效應下，上證綜合指數收市1.9%，深圳綜合指數則升3%。
A股造好下，雖然穆迪早兩日將香港信貸評級由穩定降至負面，港股開始依然跟住A股向上。港股一度飆313點，高見20512點，午後中港股市齊齊升勢放緩，恒指最終升超過兩百點，收報20435點，升235點；國指收報8686點，漲124點；成交增至727億元。
藍籌股中，本周四公佈業績的騰訊(700) 最有勢，揚3.5%，造153.3元，貢獻恒指71點升幅，長實地產(1113) 呢排表現強勁，再揚4.8%，報47.65元，為表現最叻藍籌，零售股繼續唔靚仔，上個財季銷售數據差的百麗(1880) ，股價倒跌3.89%，報4.69元，為包尾藍籌股。
萬科企業(2202) 去年多賺15%，同時引入深圳地鐵子公司注入資產，成為主要股東，擊退想惡意收購的寶能系。萬科股價最多急升20%，收造20.15元，仍大升10%，跑贏一眾國指成份股。
中信入股谷起中海外
內房近日成為穩定經濟的重點，相關消息特別多，中信股份(267) 落實向中國海外(688) 出售內地物業開發資產計劃，涉及金額310億元人民幣，消息公佈後，兩隻股份個別發展，中信跌2.6%，報12元，為表現第二曳藍籌；中海外則升1.75%，造26.2元；唔知係咪憧憬母公司中海外業務擴展，將來有機會做多啲生意，抑或係市值細加貨源集中，同系負責物業管理的中海物業(2669) 爆升25%，收造1.13元。
中信今次出售房地產，主席常振明坦言唔係睇淡樓市，而是發展不好的業務要與最好夥伴合作，透過重組業務與最好企業共同發展是集團戰略。中信股份今次出售住宅項目並無套現，而是換取中海外股權，他不評論未來會否增持中海外股權。
中信股份向中國海外出售絕大部份手持的住宅業務，涉及內地25個城市，土地儲備面積約2400萬平方米。總作價310億元人民幣，最終作價有上落5%的調整空間，中國海外將發行近10.96億股新股及轉讓旗下物業組合，作為交易對價。完成交易後，中信股份將成為中國海外第2大股東。呢次交易顯示，內地房地產開始進入汰弱留強最後階段，龍頭公司控制權變成好吸引的資產，無論係萬科抑或係中國海外，都引起超級大戶收集興趣。
陸羽仁
金融High Tea 舊文
來源 source: http://hdfin.stheadline.com
