中環在線：心境後生 鍾意《阿凡達》
呂志和愛睇刺激電影
■呂志和話最鍾意睇啲夠刺激又高科技嘅電影，好似《阿凡達》咁。
銀河娛樂（027）主席呂志和今年87歲，成日笑咪咪，原來佢人老心不老，心境好後生，十分鍾意新嘢，睇戲要睇夠刺激嘅，聽歌睇show要睇新潮嘅，電影《阿凡達》同美國天後L
ady GaGa竟然係佢杯茶！
聽歌要捧GaGa場
話說呂志和早前接受彭博訪問時透露，打算喺銀河第3、4期，搞個類似《阿凡達》嘅高科技主題公園，畀一家大細玩。呢套喺2009年上映、紅爆全球嘅3D大片，呂志和真係有睇過㗎喎。計番條數，當年佢都80歲，睇呢套3D片時，唔知有冇睇到頭暈呢？
八卦一輪，發現呂志和閒時好鍾意睇戲，最like係夠刺激又高科技嘅電影，應該都係鍾意追求官能享受。至於慘情、生離死別嗰類催淚電影，佢就冇乜興趣嘞。
咁佢去邊度睇戲呢？佢咁有錢，照計一定可以喺屋企整個音響、銀幕都超水準嘅私人影院喇，不過佢都係喜歡過大海，去旗下澳門銀河入面嘅UA戲院睇戲，佢亦唔會包場，同其他客人一齊睇。以後大家去開嗰間戲院，可以留意旁邊有冇位戴住「賊仔帽」嘅老人家喎。
呂志和唔只睇戲潮，聽歌都要夠hit。話說有次佢公司舉行晚宴，職員預先問佢想聽乜歌，呂志和就話「最緊要夠新潮」。2012年，Lady GaGa來港開騷，佢都有去捧場。真估唔到呂志和鍾意聽「baby, I was born this way」，而唔係「浪奔浪流……」。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
